Halad kang Senyor Santo Niño

Gikan sa pultahan sa Basilica, nagluhod nga naglakaw si Nimfa paingon sa altar sa simbahan, diin sa kilid niini, anaa ang rebulto sa imahen ni Senyor Santo Niño. Nagkibot-kibot ang iyang baba nga padayong nagluhod nga naglakaw.

“Senyor Santo Niño, akong halad kini kanimo! Halad pasalamat kining akong gibuhat karon, tungod sa milagro nga imong gipasinati sa gihambin kong sakit sa lawas! Halad ko kini kanimo nga mag-antos sa paglakaw nga magluhod, atol ning adlaw sa imong kapistahan...!”

Daghan nang higayon nga magping-it sa kasakit si Nimfa sa iyang tiyan, matag sugmat niini. Tungod sa kabalaka sa iyang banang si Tony nga usa ka regular nga kawani sa city hall, gipa-ultrasound ang iyang tiyan sa usa ka pribadong ospital.

Migula sa resulta sa ultrasound nga duna diay siya’y 7.5 centimeters nga cyst sa matris ug maoy sugyot sa doktor ang usa ka hinanaling operasyon niini. Bisan sa awhag sa iyang bana ug sa duha ka anak nilang dalaga nga pulos pa mga estudyante sa kolehiyo, nga magpa-opera gayud siya, bahala na og maka-lending sila og dakong kantidad nga kuwarta, hugot nga mibalibad si Nimfa. Dili siya buot nga makaundang sa iyang pagmaestra sa publikong eskuylahan sa elementarya.

Gawas pa, nakaobserbar man gud si Nimfa sa kauban niyang maestrang suod nga higala sa ilang barangay nga gioperahan sa mayuma sa matris. Milampos man tuod ang operasyon, apan paglabay sa usa ka tuig, maoy namatyan sa kauban niyang maestra ang agi sa inoperahan sa iyang matris nga matandog ug nag-bleeding na hinuon.

Midangop si Nimfa sa hugot nga pag-ampo ug pagsalig kang Senyor Santo Niño. Nahimo siyang debuto ni Senyor Santo Niño. Halos kada adlaw siyang mosimba ug mohalok sa imahen sa milagrusong bata. Gipangayo ni Nimfa kang Senyor Santo Niño nga hingpit siyang mamaayo sa gihambin niyang sakit nga cyst sa matris nga dili na kinahanglan nga operahan.

Paglabay sa tulo ka bulan, nagpa-ultrasound pag-usab si Nimfa sa iyang tiyan. Dakong milagro. Nahibulong ang mga doktor. Hingpit nga napapas na ang 7.5 centimeters nga cyst sa matris ni Nimfa! Gimilagrohan siya ni Senyor Santo Niño!

“Pit Senyor! Viva Senyor Santo Niño...!” wa kapugngi ni Nimfa ang pagsinggit sa iyang tingog niadtong buntaga sa Pista’s Senyor, samtang padayong naglakaw nga nagluhod gikan sa pultahan ngadto na sa altar sa Basilica. (Kataposan)