Salamat sa pabuto

Gula 12

Nakabantay tingali si Zeny nga ingon sa gibati na og dili matukib nga kahinam si Ruben sa tanto nila nga pagparayganay mao nga mikalma siya. Gitutokan niya si Ruben ug nagkatinutokay sila’ng duha.

“Kanus-a ka molarga paingon sa Dumaguete?” iyang gipangutana si boyfriend niya nga seaman. “Ugma unta, apan mahimo ra nga akong iuswag sa sunod adlaw kay mora’g dili ko gusto nga mahilayo dayon kanimo,” ni Ruben.

Mipahiyom si Zeny nga wala’y hunong sa pagtutok sa iyang boyfriend. “Mas maayo hinuon kay makigpanuroy ko nimo ugma sa Cebu City. Dugay na ko nga wala makasuroy sa siyudad… puwede ba?” matud ni Zeny.

“Sure, sige mas malipay pa gani ko nga ikaw g’yud ang misugyot nga manuroy ta,” giingnan ni Ruben si Zeny. Subli nga giparaygan ni Ruben ang iyang girlfriend ug sa makausa pa giukoban ang lumoy kaayo’ng mga ngabil sa dalaga.

Hugot kaayo kini nga gigakus ni Ruben nga ingon sa dili na makaantos sa iyang gibati. Gipasagdan ra siya ni Zeny nga mihapuhap sa lainlaing bahin sa iyang kalawasan. Apan diha nga mohikap na unta si Ruben sa labing pribado’ng parte sa lawas sa dalaga, gisanta siya ni Zeny.

“Ayaw, ayaw Ruben,” paraygon ang tingog ni Zeny. “Please Zen, ayaw ko’g pugngi, please,” ingon sa nagpakiluoy g’yud si Ruben apan wala magpadala si Zeny sa kabalaka nga maabtan sila sa iyang mga ginikanan.

“Nakasabot ko sa imong tumong Ruben. Ayaw dinhi kay basin moabot na sila si Papa ug Mama gikan sa Aloguinsan. Ugma na lang inigpanuroy nato,” matud ni Zeny.

Wala na lang mamugos si Ruben. “Sige ha? Bantay ka g’yud kun imo lang ko nga pakyason,” paraygon kaayo si Ruben nga mihawok ni Zeny. (Sumpayan)