Salamat sa pabuto - Gula 9
Duha ka semana na nga si Ruben miestar sa balay sa iyang ig-agaw sa Toledo. Kun wala pa sila magkaamiga ug si Zeny molanat ra unta og tulo ka adlaw ang iyang pag-estar sa Toledo.
Sulod sa duha ka semana nga pag-estar ni Ruben sa Toledo kada adlaw gayud siya nga mobisita ni Zeny. Nakabatyag si Ruben nga nagkaanam og kasuod kaniya si Zeny apan wala gayud kini modawat sa iyang gihalad nga gugma.
“Magpanagana g’yud ko nga mosugot nimo Ruben kay usa ka man gud ka seaman. Naa sa akong huna-huna ang gihimo kanako sa kanhi nako boyfriend nga mibiya lang nga walay pananghid,” matud ni Zeny.
Wala na lang motingog pa si Ruben. Taud-taud, nananghid siya nga mopauli na sa balay sa iyang ig-agaw. Pagkagabii, mibalik si Ruben sa balay nila ni Zeny. Subo ang panagway sa ulitawo nga nananghid ni Zeny.
“Mopauli na ko sa Dumaguete ugma sa buntag Zeny. Akong lauman nga makabalik pa ko dinhi sa Toledo ug magkakita pa gihapon kita sa dili pa ko mobalik pagsakay sa barko nga akong gitrabahoan,” matud ni Ruben.
Nakalitan si Zeny sa iyang nadungog. Nabasa ni Ruben sa panagway sa dalaga nga gihakop kini og kasubo. “Mouli ka na diay? Mingawon na unya ko nimo Ruben. Sulod sa pipila ka adlaw nga nagkasuod ta, nahimo ka’ng duol kaayo nako.”
Nagpabilin nga nagpakahilom si Ruben. Mikuot kini sa iyang pitaka ug mikuha’g kuwarta. “Dawata ni. Padad-an ko ikaw kanunay og panggasto nimo ug sa imong anak. Tumanon nako ang akong gisaad nga kaabag mo ako sa pagpadako ni Dodong,” giingnan niya si Zeny.
Napahilak si Zeny ug nagakus niya si Ruben. “Ayaw mi’g biyai si Dodong, karon pa lang nako natugkad nga nahigugma usab ako kanimo.” (Sumpayan)
- Latest
