Jezebel

Gula 155

“Kumosta ang imong trabaho, Day Jezebel?” Gipangutana ko ni Mrs. Lim samtang nagmasahe ko niya. “Nakauyon ka ba?”

“Malipayon ko sa akong pag-alagad ninyo, misis. Komportable ko sa akong trabaho dinhi. Nagpasalamat ko nga ikaw ang nahimo ko’ng agalon,” maoy akong tubag.

“Salamat kun mao kana. Aw, tuod... kontento ka na ba sa suweldo nga akong gihatag nimo? Basin gigamyan ka ra?,” ni Mrs. Lim. “Kontento na ko, misis uy. Husto man ang gihatag mo kanako nga suweldo.”

“Maayo. Sagdi lang. Sa sunod buwan, tingali’g akong usbawan ang imong suweldo kun magpadayon ang imong kabuotan ug kakugihan.”

“Daghang salamat, misis,” nako pa.

Diha nga nahuman na ko’g hilot ni Mrs. Elvira Lim, nananghid ko nga mogawas na sa iyang kuwarto. Mitando si Mrs. Lim uban ang pahiyom.

“Salamat sa imong paghilot nako,” niya pa.

Igo lang ko mipahiyom agi’g tubag sa iyang gisulti. Unya migawas na ko sa iyang kuwarto. Milahos na ko sa servants quarter aron makapahuway na.

Ablihan ko na unta ang pultahan sa akong kuwarto sa diha’ng nakadungog ko’g igham gikan sa akong luyo. (Sumpayan)