Ang medalyon

Halos nagkadungan lang og pangabot ang mga anak ni Ingko Tornino, sila si Jimmy, Rolly ug Amy nga pulos atoa na sa layong dapit nanimuyo. Katapusang miabot si Lino ang kamanghuran nga anak nga lalaki.

“Kumusta na si Tatay?” pangutana pa ni Lino sa mga igsuon.

“Toa man sa taas! Buhi pa man!” tubag pa ni Jimmy.

Unang misaka sa balay si Lino ug misunod ra usab ang mga igsuon. Dili tiaw ang gibating kaluoy ni Lino nga nagsud-ong sa amahan nga gawas nga dili na mubuka ang mga mata panagsa na lang sab kini moginhawa.

Mahadlok nga moduol ang ubang mga igsuon ni Lino sa ilang amahan kay nagsige kini og wara-wara sa tuong kamot nga may itom nga panapton nga gikuptan. Nga maoy gituohang may sulod kini nga medalyon sa pagkaungo. Gidungog man gud kuno kini si Ingko Tornino nga hitakdan sa pagkaungo kay daghan na man kuno ang nakasakop niini nga magtuwad sa agianan.

Apan dili babag ang pagkaungo sa ilang amahan sa gibating kaluoy ni Lino aron lang kini makapahulay na sa dayon.

Iya kining gidawat ang kamot sa iyang amahan nga may panaptong itom nga may sulod kini sa gituohang medalyon dungan ang pagkabugto sa gininhawa niini. Naniga ang mga mata sa tanan igsuon ni Lino. Dili sila makatuo nga buhaton kini sa ilang igsuon kay sigurado gayud sila nga mao na unya kini ang mabinlan sa pagkaungo.

Human ikapahiluna ang patay’ng lawas ni Ingko Tornino sa kapahulayang dayon. Nag-iyahay na sa pagpangawagtang ang tanang mga igsuon ni Lino sa tagsa-tagsa nila ka mga dapit diin atoa na sila nanimuyo.

Samtang nag-inusarang nagpabilin si Lino sa balay sa amahan. Lawom na ang kagabhion apan wala pa gihapon siya duawa sa duka samtang padayong nagpaniid sa kaugalingon kung aduna ba kini kausaban mahitungod sa iyang pagdawat sa kabilin sa amahan nga mao ang medalyon sa pagka-ungo. Miabot na lang ang kabuntagon ug naglawom na lang iyang mga mata tungod sa walay tulog apan wala gayud kini makabantay nga siya naungo. Nakahukom si Lino nga ablihan ang maong panapton nga itom ug iyang tan-awon ug unsa ba gayud ang dagway nianang medalyon sa pagka-ungo nga maoy kabilin nga iyang gidawat gikan sa iyang amahan. Halos namudlat ang iyang mga kalimutaw human  niya’g abli sa panapton itom kay imbis medalyon sa pagkaungo usa man hinuon kini ka tansan nga may tatak nga usa ka milyon ka pesos gikan sa kompaniya sa softdrinks. Labihang lumpayat ni Lino nga nakasinggit sa kalipay. Sulbad gyud ang kalisud! (Katapusan)