Suki nga pasahero

Gula 12

Samtang nagdagan ang PUJ paingon sa siyudad, giteksan ni Lorena si Val. Apan wala gayud siya makadawat og tubag. Gisuwayan og kontak ni Lorena ang numero ni Val, apan dili usab makontak. Misamot nga wala na gayud makasabot si Lorena sa iyang gibati.

Maoy diha sa iyang huna-huna nga gilikayan na siya ni Val. Apan walay igo nga rason aron likayan siya ni Val. “May number ka ni Val dong?” gipangutana niya ang konduktor sa PUJ. Milingo-lingo ang konduktor samtang mitutok kini kang Lorena. “Wala na man to’y cellphone si Val kay iya man nga gibaligya sa kauban niya’ng drayber,” matud sa konduktor. Misamot nga naglibog si Lorena. Wala g’yud siya makasabot ngano nga gibaligya man ni Val ang iyang cellphone?

Samtang nagdagan ang PUJ paingon sa siyudad, gipiyong ni Lorena ang iyang mga mata. Apan sa iyang pagpiyong, nagduhiraw ang iyang kaisipan nga nangalap og tubag sa mga pangutana nga naghadla sa iyang kaisipan. “Unsay nahitabo ni Val? Ngano nga kalit ra man kini nga nahanaw?” Nagsugod na pagturok sa kaisipan ni Lorena nga dili diay matinud-anon si Val sa iyang gugma.

Gikan nga nagpa-enrol, miuli dayon si Lorena sa ilang balay. Wala siya sa maayong buot nga naghuna-huna. Mideritso siya pagsulod sa iyang kuwarto ug nakatulog. Hapon na nga nahigmata si Lorena.

Misuroy siya sa balay sa iyang amiga nga nagpuyo duol sa basketball court. Gitug-an niya ang iyang problema kun hain na si Val. “Ayaw dayon pagdali-dali sa imong huna-huna day uy, sutaa usa kun ngano nga wala na siya makakontak nimo,” tambag sa higala. Kilum-kilum na. Giapas si Lorena sa iyang inahan. “Lorena, pauli na kay tua nagpaabot kanimo si Val,” matud sa iyang inahan. Abtik nga mipauli si Lorena nga ingon sa naghinam-hinam nga makita si Val. (Sumpayan)