Panaad sa Bag-ong Tuig

Bag-ong Tuig. Bug-os na ang hukom ni Justin nga mamalhin sa probinsiya. Way kalinaw ang ilang pagpuyo su’d sa unang tuig sa ilang kaminyuon dinhi sa Siyudad. Pulos gubat ilang nasinati.

Maihap lang sa tudlo ang adlaw nga di sila mag-away. Kanunay man gud mabati sa iyang asawa gikan sa iyang higala nga may iring-iring si Justin. Mao nga mitubo ang selos ni Valerie.

“ Valerie, karon nga Bag-ong Tuig, bag-uhon usab nako ang akong kinabuhi. Ning  bag-o natong kalibutan biyaan nako ang bisyo nga giayran mo. Ug palambuon ko atong negosyo,” panaad ni Justin.

“Hinaut Justin ang panaad mo adunay katumanan,” pangindahay ni Valerie.

Malipayon si Valerie sa dagan sa ilang pagpuyo dinhi sa probinsiya. Nagpatukod silag restawran . Hapsay ang ilang pagpuyo. Ug milambo ang ilang negosyo.

“Tan-awa Justin nga mibiya ka sa imong bisyo wa nay giyera,” ni Valerie.

“Bunga kini sa akong panaad sa bag-ong tuig Valerie,” tubag ni Justin.

Gikalipay sab ni Justin ang dagan sa iyang kinabuhi. Nalayo na siya sa tental sa panahon. Padagan sa ilang negosyo  maoy iyang gitutukan. Apan wa niya damha nga may kaliwat ni Eba mitapad niya sa iyang pagtan-aw sa liga sa basketball sa plasa. Ang babaye nga maoy hinungdan sa gubat sa iyang pamilya.

“Nganong ania ka Minda,” mubong pangutana ni Justin.

“Magkita na lang ta ugma sa simbahan, alas nuybe sa buntag Justin. Adto nako ipasabot nimo ang tanan. Kun di ka moabut sa tukmang oras  kalimti nga dunay Minda nga nagmahal nimo,” prangka ni Minda.

Gipakita ni Justin nga nasubo siya sa pulong ni Minda. Apan sulod sa iyang dughan milumpayat sa kalipay tungod kay iyang panaad sa Bag-ong Tuig adunay katumanan. (Kataposan)