Suki nga pasahero

Gula 10

“Puwede ba nga mo-kiss ko nimo Lor?” gisukna ni Val si Lorena. Mapanagan-on kaayo si Val nga mohangyo’g kiss sa iyang sweetheart. Mahadlok si Val nga magtuo unya si Lorena nga mapahimuslanon ra kaayo siya kay bag-o pa g’yud sila nga nagkahigugmaay.

Wala motubag si Lorena sa gihangyo ni Val kaniya nga mo-kiss. Mora’g gibati ni Val ang kauwaw nga ingon sa gibalibaran ni Lorena nga mo-kiss. “Sori kaayo Lor ha, sige, dili lang usa ko mamugos nga mo-kiss nimo kay basin og makaingon ka nga presko ra kaayo ko nga pagkatawo.”

“Ha? No problem uy kun mo-kiss ka. Natural man g’yud na nga mo-kiss ang boyfriend sa iyang girlfriend,” ni Lorena nga migunit sa bukton ni Val nga nag-agbay kaniya. Ingon sa gibayaw sa langit sa tumang kalipay si Val nga nakadungog sa gisulti ni Lorena.

Gihagkan niya sa aping ang dalaga. Milingi si Lorena kang Val ug gitaon niini ang iyang nawong. Wala makapugong si Val, giukoban niya ang mga ngabil sa dalaga samtang gigakos niya pag-ayo si Lorena.

Usban pa unta ni Val sa paghawok si Lorena apan nabanwagan sila sa suga sa nagdanga-danga nga PUJ. “Sakay na uy kay mobalik na ko sa amo, basin mangita na sila si papa ug mama nako,” matud ni Lorena.

“Sige Lor, salamat kaayo ha? Tukma kaayo kay ang PUJ man diay kini sa akong agawon ang nagpaingon dinhi,” giingnan ni Val si Lorena. “Moadto na ko ha? Mosakay ka man kaha ana nga PUJ. Bye, love you,” matud ni Lorena dayong lakaw subay sa sementado nga dalan-dalan.

Tam-is kaayo alang kang Val ang pulong “love you” nga iyang nabati gikan kang Lorena. “Diin ka man Val? Nang-disco ka no? Disco man diha sa unahan,” matud sa tistisan nga drayber. (Sumpayan)