Sigbin maoy naghatod sa pinaskohan

Dinhi sa balangay sa Santa Ines si Mr. Benigno maoy dangpanan sa mga lumolupyo panahon sa mga kalisdanan ug kapit-os nga di lang hibaw-an mohamok sa matag linalang ning kalibotan. Ug dinhi sa ilang baryo daghan nang natabangan ni Mr. Benigno. Tanang matang sa tabang iya nang gikadalit ngadto sa iyang mga katagibalangay.

Daghan ganing nag-ingon nga kun modagan lang si Mr. Benigno segurado gyung landslide kini batok sa ilang kapitan nga si Dionisio nga mahilig og mga private armies. Apan igo lang mopahiyom si Mr. Benigno dihang gipasumbingayan siya ni Molong, ang batabata sa mayor sa lungsod.

“Dili ko hilig og politika, Long,” ni Mr. Benigno pa. “Maayo man na kay dangpanan ka sa katawhan, apan, kining akong gibuhat igo na ni nga nakatabang ko sa akong isig ka tawo...” Kalmang pahayag ni Mr. Benigno.

Unya dunay tabitabi ug kining maong tabitabi dugay na ug karong bag-o mibalik na pud, nga si Mr. Benigno nakit-ang nagtuwad sa ilawom sa dakong punoan sa mangga ug nga kini kuno si Mr. Benigno hilabihan diay ka mangtas nga ungo. Ug duna pa kunoy daghang sigbin.

“Di ko motuo ana, uy. Ibyang,” ni Molong pa ngadto sa iyang asawa. “Ungo gud tawon. Kadato anang Mr. Benigno unya ingnon nilang ungo. Kanang nagpalakaw anang tabia nasuya nang Mr. Benigno...labi na’g wala mahatagi’g tabang, na, samot ang pagsige’g daot niya.”

Pag-abot sa Noche Buena, alegre kaayo ang kagabhion kay madungog ang mga butobuto sa rebentador, kuwitis, lantaka ug siga sa gidagkotan nga benggala.

Ug nakugang si Molong dihang may nakita siyang mura’g mga kanding ug sa iyang pagsuta, maoy iyang nasaksihan nga mga sigbin diay. Nahaulpot siya sa iyang gibarogan kay maoy iyang nakita nga dunay dalang mga pinaskohan ang mga sigbin nga gipamutos og Christmas wrapper. Unya nanglakaw dayon ang napulo ka buok sigbin ug dihang gipunit ni  Molong ang gamay’ng papel ug unya gibasa niya, kini nag-ingon. “Molong, gihatod sa akong mga binuhing sigbin, malipay gyud mo ana! Magkita lang unya ta karong tungang gabii...” Ug gikulbaan si Molong ug kakuhaon siya dili sa mga pinadalang pinaskohan. (Kataposan)