Jezebel

Gula 142

“Ayaw pagkatulog og sayo, ha, Jezebel,” ni James pa. “Mga alas nuybe imedya moadto na ko sa imong kuwarto. Di na lang ko manuktok aron di makamatikod si manang Ester. Ayaw lang i-lock ang seradora sa pultahan aron dili ko maglisod pag-abli. Mo-text sab ko nimo kun magpaingon na ko sa imong kuwarto, aron ka makapangandam.

“Nabalaka ko, James,” giingnan ko siya. “Tingali’g masakpan ta sa kadugayan.”

“Ayaw kabalaka, Jezebel. Nia ko. Dili ko ikaw pasagdan kun magkinaunsa man.” Wala na lang ko mo-ik. Mura man ko’g mananap nga gibutangan og busal ni James ang ilong. Sunod-sunod lang ko kun unsay iyang gusto.

Tuod man, nianang pagka 9:45 sa gabii nakadawat ko’g text gikan kang James. Iya ko’ng gipahibalo nga nagpadulong na siya sa akong kuwarto.

Nangandam ko sa akong kaugalingon. Gituman nako ang iyang gisulti nga dili nako i-lock ang seradora sa pultahan aron dili siya maglisod pagsulod.

Dangtag pipila ka gutlo inanay nga naabli ang pultahan sa akong lawak. Bisan ngitngit ang sulod sa lawak apan naaninag nako ang pamayhon sa tawo nga mainampingong misulod sa pultahan. Wala gayud siya makamugna’g kasikas. – (Sumpayan)