Ang lana ni Ingko Beroy
Naukay ang mga lumolupyo sa sityo Hangad-Langit dihang mikaylap ang balita nga si Ingko Beroy nabuhi gikan sa iyang pagkamatay. Puwerting liboga sa ulo ni Kapitan Isyot nganong nahitabo nga nabuhi ang tiguwang manghihilot nga unta gilubong na man kini niadtong miaging semana.
Ug ning maong hitabo nga mura’g usa ka dakong sunog nga mikaylap sa tibuok balangay sa Kamatis diin mahisakop ang sityo Hangad-Langit, gusto ni Kapitan Isyot nga masusi ug masuta gyud pag-ayo kun unsa ka tinuod ang maong balita.
“Tinuod na, kapitan, kay dihang nangumpay ko’g mga dahon sa tugas akong nakita si Ingko Beroy nga nagguna luyo sa ilang balay,” ni Islaw diyong pa nga misugid sa Kapitan.
“Yamat, tinuod ka gyud, Islaw?” mikunot ang agtang ni Kapitan Isyot. Unya nanghupaw siya. “Dili bastabasta ning balitaa da, kun mao na may gahom kana si Ingko Beroy.”
“Gidungogdungog baya na siya nga ungo kay may nakakita nga nahimo kunong dakong iro dihang mitabok kini sa sapa,” padayon ni Islaw. “Tingali, kapitan, dili to si Ingko Beroy ang diha sa sulod sa lungon.”
Wala motingog si Kapitan Isyot. Mura’g dunay lawom nga gihunahuna. Unya nianang pagka-gabii nagkaguliyang ang mga lumolupyo kay si Inday Lagring, ang biyuda nga asawa ni anhing Pedring sugarol gibalbal ug maayo kaayong pagkagalhab sa iyang tiyan. Ug duna dayoy daghang mga silingan nga misaksi sa nahitabo ni Inday Lagring.
Taudtaod mitumaw si Ingko Beroy ug miapil siya pagtan-aw sa gibalbal nga biyuda. Mikunot ang agtang ni Ingko Beroy. Unya miabot si Kapitan Isyot, mura’g kalma kaayo ang iyang mga lihok. Mitan-aw si Ingko Beroy kang Kapitan Isyot ug miingon, “si Kapitan Isyot maoy mibalbal ni inday Lagring,“ sa tiguwang pa. “Usa siya ka mangtas nga ungo, kay anak siya ni Kuwal nga hilabihan ka mangtas.”
Ug may gikuha si Ingko Beroy nga usa ka grapa nga may sulod nga lana ug iyang gipahiran si Kapitan Isyot.
“Miutnga si Kapitan Isyot nga gisakitan ug mikurog,” “Ingko...ingko, ayaw ko’g pahiri anang imong lana, haaa, haaa,” ug nahimo siyang usa ka dakong iro. (Kataposan)
- Latest
