Jezebel

Gula 140

Pagkaugma, giduol ko ni manang Ester samtang nag-apong ko sa washing machine sa may labhanan. Gitimbaya ko siya dihang nahiduol na siya kanako.

Mibalos siya pagtimbaya. Nakamatikod ko nga iya ko’ng gitutokan.

“Migawas ka ba sa imong lawak kagabii, Jezebel?” Gikan ni manang Ester.

Wala dayon ko makatubag kay nakalitan ko sa iyang pangutana.

Kalit lang ko’ng gikulbaan. Wala ko masayod kun unsay akong itubag sa pangutana ni manang Ester. Kun tug-anan ko siya sa tinuod, tingalig mangutikuti siya kun nganong migawas ko sa akong kuwarto atol sa lawom nang gabii.

Kun molimod ko, tingalig makasabot siya nga namakak ko. Mao nga naglibog ko’g maayo.

“Kagabii nakadungog ko’g lagubo sa pultahan sa imong kuwarto,” nagkanayon si manang Ester. “Nakamata man gud ko mga ala una sa kaadlawon.

Ug maoy akong nadunggan nga milagubo ang pultahan sa imong lawak. Dili hinuon kusog pero tungod kay mingaw na ang kalibotan, nakaseguro ko nga ang pultahan gayud sa imong kuwarto ang milagubo.

“Akoy nakamugna sa maong lagubo, manang,” nako pa nga nakakita’g lutsanan. “U-unsa? Ang buot mong ipasabot nga migawas ka diay kagabii?” (Sumpayan)