Mora na’g dili kaila

Dear Tita Salie,

Hello! Tagoa lang ko palihog sa pangalan nga Nikki, 18 years old, dalaga. Aduna koy uyab karon nga maoy nakapahasol nako.

Everytime gud nga mag-away mi, Tita, dili na siya motingog nako. Dili na usab siya mutagad nako bisan pa man kun nagtupad ra mi og bisan sa sunod adlaw nga magkasugat mi. Dili usab siya mo-text, wala gyuy communication nga mahitabo. Mora ra gyud mi og dili kaila.

Kun ako lang seguro nga pasagdan dugay na gyud mi nga nagbulag sa walay klarong estorya. Kinahanglan pa gyud nga ako siyang unhan og tagad. Maghulat lang gyud siya kanunay nga akoy mouna pagtagad. Mouna na lang ko tungod kay love man kaayo nako siya.

Maayo kahang ipadayon nako ang akong gugma kaniya? Palihug pasabta ko, Tita Salie. Thank you so much.

* * *

Dearest Nikki,

Lisod pakisamahan ang tawo nga taas kaayo og pride. Kay imbes gusto ta og peaceful nga relationship dili kini nato maabot tungod kay passive kaayo ang imong partner. Nahimo siyang passive tungod sa iyang pagka taas og pride nga dili gyud mutagad kondili unhan og tagad.

Kun ang duha ka tawo pareho nga taas og pride og nag-away sila, molanat gyud og taas nga panahon ang maong away tungod kay pareho man silang duha nga naghulat kun kinsay mutagad pag-una kay pareho man silang duha nga naghulat kun kinsay motagad pag-una kay pareho man sila nga dili mouna og tagad tungod sa ilang garbo.

Kun gusto nimong ipadayon ang maong relasyon, andama na lang ang imong kaugalingon alang niining maong batasan. Kinahanglan nga kaya gyud nimo nga ikaw ang magpaubos kanunay.  -- Tita Salie