Pinaskohan ni Mrs. Tibon

Unsa may problema nimo, Allan? Kun di ko nimo pahibaw-on, wa gyud koy ikatabang nimo!” ni Mrs. Tibon nga niduol ug nihapuhap sa ulo sa bata. Niduko lang si Allan.

Nitulo ang luha. Sa pagpamuhi sa klase sa iyang mga pupil sa grade three, gipapabilin ni Mrs. Tibon sa lawak saringan si Allan. Kay nahibulong siya nga masulob-on ang bata ning nanglabay nga mga adlaw nga hapit na ang Christmas vacation. Dagko’g kuha ang bata sa daily quizes. Karong kabag-ohan nibahar iyang mga score. “Gidagmalan ka ba sa inyo?” ni Mrs. Tibon. Sige la’g hilak si Allan. Ug sa dugay’ng sukitsukit sa maestra, nitug-an na gyud si Allan nga nagbuwag iyang papa’g mama tungod sa bisyo’s iyang mama sa pagpanugal. Daghang utang sa lending. Nasagpaan sa iyang papa.

“Pila na man ka adlaw nga wa niuli sa inyong gipuy-an si papa nimo?” ni Mrs. Tibon. “Usa na ka semana” ni Allan. “Nahala. Sige pauli na. Unya kay silingang baryo ra man ang gibalhinan og puyo ni papa nimo, adtoa siya. Ingna nga makig-estorya ko niya. Si mama sab nimo ingna nga makig-istorya ko niya. Kay dili maayo nga madaut imong pagtuon sa away-away sa imong ginikanan” ni Mrs. Tibon.

“Salamat ma’am” ni Allan nga medyo nalagsik. Nilaum siya nga makatabang iyang magtutudlo sa problema sa iyang pamilya.

Magtutudlo sa national high school sa ilang lungsod sa Farbena ang papa ni Allan. Iyang mama dunay gamay’ng tindahan sari-sari sa balay. Apan kulang ra ang halin ipamayad sa utang.

Pagka-sunod adlaw sa buntag, didto sa lawak sa guidance counselor nakighinabi si Mrs. Tibon sa mga ginikanan ni Allan. Gitagsatagsa niya sila’g pakigsulti. Gimaymayan niya ang magtiayon sa dautang epekto sa pag-eskuyla sa ilang bugtong anak ang ilang pag-away-away.

“Puro mo may depekto. Pagbag-o mo aron mahibalik ang kalinaw ug kalipay sa inyong pamuyo” ni Mrs. Tibon dayong gawas sa lawak. Gibiyaan ang duha nga nagka-istorya. Dangta’g pila ka minutos, nanggawas sila nga namahid sa luha.

“Unya. Unsa na man?” ni Mrs. Tibon nga diha ra’s corridor. “Nisaad ko nga di na moinom. Ug di na manapat” sa bana.

“Nisaad ko nga di na manugal ug di na mangutang” sa asawa.

“O sige. Kiss and make up” ni Mrs. Tibon. Naggakos ang duha. Ug nag-akob ilang mga ngabil. Gipagawas ni Mrs. Tibon si Allan sa laing lawak. Malipayon kaayo si Allan nga nakakita sa iyang mga ginikanan nga loving na. “Salamat sa imong Pinaskohan, ma’am Tibon” ni Allan nga nigakos sa magtutudlo. (Katapusan)