Babaye sa kabaret

Gula 9

Wala masayop si Elizar. Wala danti’g dugay nakalantaw na siya’g duha ka tawo nga nagdagtom nga migawas gikan sa lawak nga gisudlan sa iyang tiyo Berto ug niadto’ng babaye nga dancer sa kabaret. Mipaingon kini sa iyang nahimutangan. “Dong, grabeha’ng babayhana modala’g kumbati sa katre uy, layo ra kaayo si tiya nimo. Pero ayaw baya pagsaba dong ni tiya nimo ha nga nanulod ta dinhi,” matud ni Berto.

“Maayo ba’g dagway kanang babaye nimo nga kapares tiyo?” gipangutana ni Elizar ang uyoan. “Mao na’y nakaproblema dong kay puwerteng ngitngita gihapon didto sa sulod,” ni Berto pa nga napahunong pagsulti kay miduol ang babaye.

Miparayeg na usab ang babaye kang Berto. Si Elizar nga diha sa tupad sa iyang pag-umangkon ingon sa nakasabot nga ang babaye mangayo’g dugang kuwarta gikan sa iyang tiyo.

Wala g’yud masayop si Elizar. Human giparayegan si Berto, mihunghong kini nga mangayo’g dugang P200. Nagpasabak pa ang babaye kang Berto nga wala g’yud mobalibad kay maoy iyang ampay.

Apan kalit lang nga adunay lalaki’ng kustomer nga nakiglalis sa babaye nga iyang kasayaw. Nagubot ang kabaret mao nga napugos ang operator sa kabaret sa pagpasiga sa suga.

Nakahigayon si Berto sa pagtan-aw sa panagway sa iyang babaye’ng kapares. Hilabihan ang iyang kahikurat tungod sa kalaksot og dagway sa edaran na niya nga kapares.  Abtik kaayo siya nga mitindog dungan sa paglingo-lingo. Nahakatawa si Elizar nga nagsud-ong sa iyang uyoan nga ingon sa wala makasabot sa iyang gibati. “Tana dong uy, mamauli na ta,” matud ni Berto.

“Batia diay’g nawong adtong akong gikapares dong uy! Guwang pa g’yud nga guwapa pa si tiya nimo,” nagyawyaw si Berto samtang nagpaabot sila’g kasakyan pauli sa balay sa iyang pag-umangkon. (Kataposan)