Maglisod og palit

Dear Tita Salie,

Maayong adlaw. Just call me Ms. Melanie, 4th year high school na unta ko apan duhaduha pa kun makapadayon ba ko tungod kay wala man gud mi kuwarta. Ug inigka 4th year na nako magkinahanglan pa mi og plantsa sa buhok ug blower alang sa among major nga subject.

Nasayod ko nga maglisod mi og palit niini kay igo ra man sa pagkaon ang among kuwarta. Gusto unta nako nga magtrabaho kadali apan dili mosugot ang akong inahan. Busa wala na lang pud ko mamugos nagpuyo na lang ko sa balay. Naglibog na ko kun unsay akong buhaton. Palihug pasabta ko, Tita Salie. Thank you so much and God bless.”

* * *

Maayong adlaw usab, Ms. Melanie,

Nganong mao man kini ang imong giproblemahan? Mao ba gyud kini ang inyong gamiton samtang magtuon mo sa high school as graduating student? Dili ba nimo problema ang mga kinahanglanon sama sa notebooks, books ug uban pa? Plantsa gyud ug blower? Adtoa kuno una sa inyong eskuylahan ug sutaa kun duna bay kamatuoran ang mga estorya nga imong mga nadunggan.

Kun high school pa ka dili pa man kini dako nga problema kun gusto gyud nimong maka-graduate. Kay dunay daghan dihang schools diin wala kaayo kay  gasto. Ayaw pa-enroll sa private schools aron menos ang imong gasto. Ang blower ug plantsa imo kining makit-an diha sa mga Taiwanese nga store ug ubos ra kaayo ang presyo.

Hinaot nga magpadayon ka pagtungha sa college aron dili ka maglisod sa imong kinabuhi. Lahi gyud ang duna kay kursong mahuman kay mao kini ang imong puhonan samtang kita manginabuhi. Pangaplay sa mga schools as scholar or working student samtang graduating pa ka aron maandam na nimo ang pagtungha sa college. -- Tita Salie