Babaye sa kabaret

Gula 1

Mikontak kang Elizar ang iyang uyoan nga nagpuyo sa bukiran nga bahin sa Badian. Nakagamit kini sa selpon sa iyang pag-umangkon nga mipauli sa ilang dapit sa bukid. Mihangyo kini kang Elizar nga anhi siya mamasko sa siyudad.

Tuod, wala balibari ni Elizar ang tinguha sa iyang uyoan. Daku siya’g utang kabubut-on ni tiyo niya Berto kay mao kini ang nag-amuma kaniya dihang nagkabuwag ang mga ginikanan ni Elizar.

“Sige tiyo, pahatod lang ni agaw Edgar diri sa siyudad kay aron ari ka lang estar sa balay atol sa imong pagbakasyon. Ako’y bahala nimo nga malingaw ka tiyo… isuroy tika sa mga kabaret ug sa mga sayawan diri nga adunay hubo-hubo,” ni Elizar pa nga nagngisi.

Ingon sa nasabtan ni Elizar nga dili matukib sa pulong ang kahinam nga gibati sa iyang tiyo nga nakadungog sa iyang mga pasalig.

“Tinuod ka dong ha? Kun madayon ni dong, una pa kini nga higayon nga makataak ko’g siyudad ug makaanha anang imong giingon nako,” matud ni Berto.

Tuod, miabot ang adlaw nga miabot na si Berto dinhi sa dakbayan. Gisugat kini ni Elizar didto sa South Bus Terminal. “Uy, pagkadaghan man diay’ng mga sakyanan dinhi sa siyudad dong! Maglisod man kita pagtabok sa karsada,” matud ni Berto nga puwerteng nakagunit sa bukton sa iyang pag-umangkon pagtabok nila sa dalan Colon.

Misakay sila’g jeep paingon sa Guadalupe diin mahimutang ang pinuy-anan ni Elizar. Mao pa gani ang pag-abot ni Berto sa panimalay ni Elizar nangutana dayon kini sa pag-umangkon kun kanus-a sila mangadto sa giingon niini nga kabaret.

“Unsa gani kadto kanang kabaret dong? Tinuod ba nga mga guwapa’ng babaye ang anaa diha?” nagpakisayud si Berto sa iyang pag-umangkon nga nagpahiyom nga nagtan-aw kaniya. (Sumpayan)