Tsinelas

Tin-aw ang sapa nga migakos sa mga batiis ni Tito, kinsa miubog sa nagdagang tubig. Misayaw iyang kasingkasing samtang nagba ni Krista latas sa sulog nga daw nakig-away sa ilang pag-agi. Gikan pa sila ilawom sa landong sa nag-arkong kawayanan, diin sama sa mga uhaw’ng lovebirds, ilang gisaw-an ang dugos sa pagminahalay.

Alas 4:00 na man gud sa hapon. Kinahanglang mahatod na ni Tito si Krista didto sa harianon niining panimalay samtang di pa muabot ang iyang mommy ug daddy. Buwahan, di maputol kining ilang tagotago nga panag-uban. Don ug Doña ang mga parents ni Kristo. Ikomparar sa nanay ug tatay ni Tito, kinsa mga saop lamang. Kanus-a ba magkasagol ang tubig ug lana? Kanus-a ba magkatakdo ang langit ug yuta?

Mitualsik ang sulog nga ingon sa nakuryentihan sa panagdapat sa bukobuko  ni Tito ug sa tindog nga mga dughan ni Krista nga sa matag karon ug unya, maumod kada lakang sa ulitawo. Hapit na sila maabot sa daplin dihang...

“Hala, nahulog ang usa nako ka tsinelas!” Tuaw ni Krista nga napalingi sa tuo nga bahin. Pagkamatikod ni Tito niini, nagdali siyang mikawas sa sapa. Pag-abot nila sa daplin, mainampingon niyang gibutang si Krista ug mihana’g balik sa sapa aron gukdon ang nagkalayong tsinelas.

Apan gipugngan-gakos siya sa dalaga: “Ayaw, Tito! Pasagdi ang tsinelas kun asa ipadpad.”

“Pero, mahal kaayo ang presyo sa maong tsinelas, Kris. Saksi ko nga P10,000 ang imong bayad sa tindera. Usik kaayo kun di to mahibalik!” Pahayag ni Tito.

Ug kalit lang siyang natiurok dihang gihubo ni Krista ang nahabiling tsinelas sa wala niining tiil ug gilabay sa sapa.

“Mahal, nganong gibuhat mo kadto? Wa ka ba masayangi?”

Pahiyom ang gitubag ni Krista nga mikabyon sa liog ni Tito.

“Mas sayang, Love, kun ikaw ang mawala nako. Nakakita ka sa unahan ... sa gipuntariyahan sa tsinelas? Kimba na kadtong dapita. Lawom nga bahin. Unya, kusog pa gyud ang lilo. Tsinelas? Makapalit pa ko’g lain nga mas mahal pa adto. Apan kun ang kinabuhi mo maoy mawala, mapalit ko pa ba kini?”

Naamang ang mga gutlo. Sa tsinelas, natugkad ni Tito unsa siya ka bililhon ni Krista. (Katapusan)