Guwapa nga piniriso - Gula 8

Wala makapugong sa paghilak si Jenny samtang mibaiid sa dughan ni Samuel tungod kay wala gayud niya paabota nga may tawo diay nga maluoy kaniya ug mutabang nga makagawas siya sa bilanggoan.

Gialam-alaman ni Samuel si Jenny nga dili na mohilak. Iyang gipasabot ang dalaga nga angay pa gani kini nga malipay kay iya man kini’ng tabangan nga ma-dismiss ang kaso sa hukmanan.

“Duna ko’y amigo nga konsehal sa siyudad ug magpatabang ta nga maestorya nato ang polis nga nagdakop nimo. Suwayan nato nga tabangan ka nga ma-dismiss ang kaso nga iyang gipasaka kay dili man diay tinuod nga nakuhaan ka og shabu,” matud ni Samuel.

Nagpamahid sa luha si Jenny nga mitutok kang Samuel. “Unsa kaha ang akong ibawos kanimo Sam niining pagtabang nimo kanako?” gitutokan ni Jenny ang ulitawo. “Yuna pa, ngano nga nakig-amiga ka man nako nga piniriso man ko?” pangutana ni Jenny.

Sayon ra tubagon ang maong pangutana apan daw naglisud pagtubag si Samuel. Nagtinutokay silang duha. Nakapangutkot si Samuel sa likud sa iyang ulo samtang naghuna-huna kun unsaon pagtubag si Jenny.

Nakahuna-huna si Samuel nga mao na kini ang higayon nga tug-anan niya si Jenny nga na love at first sight siya sa dalaga diha nga nakit-an niya kini samtang mitambong sa husay sa iyang kaso sa hukmanan.

“Dili ka kaha masuko kun itug-an nako ngano nga gihimo nako ang kutob sa akong mahimo aron matabangan ko ikaw?” gisukna ni Samuel ang dalaga. “Dili ko masuko, promise,” abtik nga tubag ni Jenny dungan sa pagbuhi og matam-is nga pahiyom.

Mitutok pag-ayo si Samuel sa panagway ni Jenny. “Unsa lagi Sam?” nagpakisusi na si Jenny nga masayod. “Buyno, kay pugson man g’yud ko nimo pagpatug-an, motug-an na lang ko. Tungod kini kay na in-love ko nimo Jen. Love at first sight.” (Sumpayan)