Jezebel - Gula 124

“Salamat nga wa ko nimo pakyasa, Jezebel,” nagkanayon si James dihang diha na ko sulod sa iyang kuwarto.

“May tuyo ka man kaha nako?” Misukmat dayon ko.“Isulti na kun unsay imong tuyo aron makabalik na ko didto sa akong katulganan.

Dili ko komportable sa sulod sa kuwarto ni James. May kahasol nga nanguyapot sa akong hunahuna. Gusto na kong mogawas sa iyang kuwarto.

“Nahigugma ka ba gayod nako, Jezebel?” Sukit ni James.

“Angay mo pa ba gud kanang ipangutana?” Gisumbalik ko siya. “Dili nako dawaton ang imong gugma kun wa pa koy pagbati alang nimo. Pero dili ko lang gayod kalikayan nga mobati’g kabalaka sa atong relasyon. Nakaseguro kong dili makadawat ang imong inahan nako sa higayon nga masayod siya sa tinuod bahin natong duha.”

“Wa kay angay kabalak-an. Nia ko nga andam manalipod nimo ug sa atong gugma.”

“Pero dili ko gusto nga akoy mahimong hinungdan nga supakon mo ang kabubut-on sa imong mama, James. Dako ang akong pagrespeto sa imong mama.” “Nasayod ko. Pero kun supakon ko man ang iyang kabubut-on, dili ikaw ang angay basulon kun dili ako tungod kay ako kining desisyon. 

Kun matinuod ang imong pangagpas nga dili makadawat si mama kanimo, mapugos ko pagsupak sa iyang kabubut-on. (Sumpayan pa)