Ang kahumot muabot

Adlaw’ng kasumaran ni Tatay Eking. Nag-ambahan kaming unom ka igsuon nga mitambong sa santos nga misa pahinungod sa among amahan. Nagpasalamat kami sa Kahitas-an nga lig-on pa siya sa pangedarong siyesenta anyos.

“Manang Marivic, misimba man ang mga igsuon ni Tatay Eking, naa sab ang igsuon niyang dato nga nagpuyo sa Siyudad,” taho sa manghod niyang si Gina.

“Nanimba lang sab na sila, Gin, kay unang Sabado man ron sa buwan,” pasabot ko ni Gina.

Among gipangandaman kining adlawa. Nagkasabot kaming managsuon nga hataga’g bonggang hikay ang among amahan.

Pahalipay namo sa iyang maayong lantaw sa kaugmaon namong mga anak. Mananagat lang siya dinhi sa barangay Malbog, apan gipuga niya ang iyang kusog sa pagbuhi’g kahayupan ug pananom sa lagutmon aron ang iyang pamilya malipayon. Sa iyang paningkamot kaming managsuon nagmalampuson sa pagtuon.

“Nia man ang mga igsuon ni Tatay Eking, Nang Marivic, nagdalag regalo,” taho ni Eddie lain kong manghod.

“Dong Eddie, atimana atong mga iyaan ug uyoan,” mando ko ni Eddie.

Naamang ko sa akong nakita. Wa ko palandunga ang ilang presensya. Daghang luha akong giusikan tungod sa kahiubos sa akong iyaan ug uyoan. Si Tatay Eking igo lang sa pagluom sa iyang gibati. Ubos ilang pagtan-aw sa akong amahan tungod kay si Tatay Eking maoy kabos sa ilang managsuon.

“Day Marivic, wa ko kapugngi ang luha sa kalipay nga nagsud-ong sa akong mga manghod nga mitambong luyo sa atong kakabos,” pulong sa akong amahan.

“Mao nay gisulti nako nimo niadto,Tay Eking, nga tungod sa imong kaayo ang kahumot muabot,” tubag ko ni Tatay Eking.

Gisunod ang makabuhong nga pagkaon  nga among gisaw-an. (Katapusan)