Minyo diay

Dear Tita Salie,

Hello! Ako si Anna, from Dumaguete. Dugay na gyod ko nga gustong magpatambag niining akong problema mahitungod sa gugma.

Duna koy uyab karon. Love kaayo nako ning tawhana ug love pod kaayo ko niya. Unya nagsinaaray ming duha nga dili gyod magbulag kay mora og dili namo kaya ang malayo sa usa’g-usa.

Apan karon bag-ohay lang akong nahibaw-an nga minyo diay’ng dako ang akong uyab ug may usa ka buok anak. Kasado gyod sila sa iyang asawa. Tungod lagi kay dili ko gusto nga makabungkag og pamilya ako dayon siyang gibulagan. Ang problema karon kay dili man siya mosugot.

Naglibog ko kun unsay akong buhaton kay gusto gyod nako siyang bulagan bisan kun masakitan ko. Palihog pasabta ko sa akong angay nga buhaton. Thanks and more power to your page.

* * *

Dearest Anna,

Makatagam gyod ang gibuhat sa imong uyab. Maglisod na hinuon tag salig sa ubang mga lalaki. Lisod na gyod ilhon karong panahona kun kinsay nagsulti sa tinuod. Aduna pay uban nga maayo kaayong magdrama aron lang ilang madala ang babaye nga gusto nilang mailad. Hinaot unta nga ang mga babaye karon magmaigmat na ug dili na magpadala dayon sa mga lalaki labina kondili pa sila suheto sa pagkatawo niini.

Ang maong matang sa lalaki, Anna, dapat gyod nga bulagan. Ug bisan kondili siya mosugot imo gyod siyang bulagan. Ayaw na paabota nga mosugot siya. Tungod kay minyo siyang dako, dili gyod maayo ug dili sakto nga inyong ipadayon ang inyong relasyon.

Ganahan pa ba diay kang makigsulti kaniya bisan imo nang nasayran nga gibinuangan lang ka niya? Dili ka na dapat maghulat sa iyang tubag sa imong pagpakigbulag kaniya. Puyde na man gani nga dili na ka makig-estorya niya kay ang iyang kinaiya dili angayan respetohon kay giilad ka niya. – Tita Salie