Engkanto

Nagubot na sab ang tindahan ni Milay nga duol sa karaang kahoy nga nangka, tungod kay nanghagis na usab si Anton, ang bagis sa ilang baryo. Kay naabtan si Karyo nga namisita ni Milay. Ug dili gusto si Anton nga naay karibal sa gugma.

Pila may dagan sa hitabo wala gyuy namisita sa dalaga, kay nahadlok ni Anton. Apan nalimot si Anton nga ang palibot sa tindahan ni Milay anaay karaang kahoy nga nangka.Ug wala mabantayi nga adunay usa ka ulitawo nga tisoy nga engkanto nga hilom nga naibog sa dalaga.

Pagka gabii namisita ang tisoy nga engkanto ni Milay. Tungod sa ka gwapo gisaaran nga sunod semana na lang tubagon ang gihalad nga gugma. Ug wa damha naniid diay si Anton ug nadungog niya ang tanan nilang gipanagsultian. Mao nga giatngan niya ang engkanto nga namisita ni Milay aron iyang bun-ogon. Kay wa siya masayod nga ang iyang karibal dili ingon nato.

Wala maglangan nagpahipi si Anton sa karaang kahoy nga nangka ug nagpadulong na kaniya ang engkanto. Ug iya gyud dayong gisumbag ang nawong ug dalang patid sa lawas sa hinurot nga kusog. Unya nakugang si Anton nga daw puthaw ang lawas niini. Ug nasuko ang engkanto nga gipareglahan ni Anton.

Wala magdugay may nabatyagan si Anton nga may nisangyad sa iyang luyo. Nahaigking si Anton kay may ikog na siya. Wa sab palandonga nagkaanam og taas ang iyang mga balhibo hangtod nga nahimo siyang aliwas.

Pagka human sa hitabo igo lang siyang gibiyaan. Ug iyang nakita nga yanong nisaka sa karaang kahoy nga nangka ang iyang karibal. Apan sa kalit lang nakurat si Anton kay ang karaang kahoy nga nangka nahimong palasyo sa iyang panan-aw. Wa maglangan daling niuli  si Anton sa ilaha kay nalisang sa nahitabo. Ug nanglurat ang mga mata sa inahan ni Anton nga si Ansing sa iyang nasaksihan.

“Anton, nganong nahimo kang aliwas?” ni Ansing. “Mama Ansing, duna koy karibal sa gugma nga akong gipareglahan. Ug siya ang naghimo sa akong pagka aliwas. Nakasabot nako ... kadto diay’ng tisoy nga tawo nga karibal nako sa gugma ni Milay ... usa diay ka engkanto!” (Kataposan)