Guwapa nga piniriso

Gula 5

Human magkapirmahay sila si Samuel ug ang iyang silingan kabahin sa pagprenda niya sa yuta, nagbuwag-buwag sila’ng duha. Wala magmahay si Samuel nga giprenda niya ang kabilin sa iyang ginikanan aron lang tabangan si Jenny nga makagawas sa bilanggoan.

Gaan kaayo ang iyang buot ngadto sa maanyag nga binilanggo. Wala maglangan si Samuel, nangita siya og bonding company nga makahikay sa dukomento sa pagpiyansa ni Jenny.  Wala magdugay ang iyang pagpangita kay nag-ilogay pa ang mga agent nga maoy mohikay.

“Adtuon nato si Jenny sa city jail sir kay kuhaan man nato siya og hulagway aron i-attach nato sa application for bail,” matud sa kawani sa bonding company. Miangkas ra si Samuel sa motorsiklo sa kawani sa bonding company. Mga 15 minutos ra ang pagdagan sa motor, didto na sila sa city jail for women.

“Brod, may priso mi nga pyansahan. Among kuhaan og hulagway,” giingnan sa kawani sa bonding company ang nagbantay sa entrance sa city jail. Girekisa sila sa dayon na nga pagsulod sa prisohan.

Gitug-anan ni Samuel ang jail guard nga gusto niya nga pyansahan si Jenny. “Kadto’ng guwapa nga piniriso? Sige huwat lang kay among ipatawag. Didto lang huwata,” matud sa jail guard dungan sa pagtudlo sa lingkoranan.

Paglabay sa 10 minutos, nalantawan na ni Samuel si Jenny nga naglakaw paingon sa ilang nahimutangan. “Uy, hala kamo man diay kini Sam? Maayo kay nahiduaw kamo diri. Dalaw man ron namo,” matud ni Jenny.

“Sori kaayo ha, nagdali ko, wala ko makapalit og makaon nga ikahatag nimo Jen. Taga bonding company kini’ng akong kauban, siya ang moandam sa imong pyansa,” giingnan ni Samuel si Jenny. Daw dili makatuo si Jenny sa iyang nadungog. Nahimo siya nga amang sulod sa pipila ka gutlo apan nagpahiyom nga mitutok ni Samuel. (Sumpayan)