Guwapa nga piniriso

Gula 4

Sa sige nila nga pagsultihanay ni Samuel ug Jenny, nasabtan sa ulitawo nga maayo’g batasan ang maanyag nga binilanggo. Mapahiyumon gani kini nga nakigsulti kaniya bisan og bag-o pa sila nga nagkaila. Gaan kaayo ang buot ni Samuel ngadto kang Jenny. Misamot ang kaikag ni Samuel nga iyang matabangan si Jenny nga makagawas kini sa bilanggoan ug makabutang og piyansa sa iyang kaso nga giatubang sa korte.

“Mobisita unya ko nimo sa city jail kay hikayon nako ang piyansa aron makagawas ka gikan sa bilanggoan,” giingnan ni Samuel si Jenny kay nalantawan niya nga nagsingabot na ang mga binilanggo nga gilambigit ang mga bukton sa pagposas ug manglarga na sila balik sa prisohan.

Nagpasalamat si Samuel sa jail guard nga mitugot nga magkasultihanay sila ug si Jenny. Miadto dayon si Samuel sa record section sa RTC aron nga makalukat siya og court clearance. Nalangan hinuon siya pagkuha sa gikinahanglan niya nga dukomento.

Apan wala usab magmahay si Samuel kay nagkaamiga man sila ug si Jenny. Misantop sa iyang kaisipan nga tabangan niya si Jenny nga makapiyansa gamit ang Surety Bond. Iprenda niya ang kabahin sa yuta nga nasunod niya sa iyang mga ginikanan daplin sa baybayon sa Bantayan.

Sigurado si Samuel nga ang kantidad nga iyang makuha gikan sa pagprenda sa usa ka parsela nga yuta igo na nga ikabayad sa piyansa ni Jenny. Dunay tawo nga dugay na nga gusto’ng iprenda kaniya ang parsela sa yuta ni Samuel nga kasikbit sa iyang luna.

Giteksan ni Samuel ang maong tawo. Wala tuod magdugay, mibawos dayon ang iyang giteksan ug nalipay pagkasayod sa hukom ni Samuel. Giingnan ni Samuel nga anhi sila magkita sa dakbayan sa Sugbo.

Pagkahapon, diha na ang maong tawo. Gihatagan dayon si Samuel og P150 mil. (Sumpayan)