Ezebel - Gula 111

Sukad nga giilisan nako ang akong simpack, wala na gayud magsamok si Edward nako. Dili na ko niya matawgan kay gilabay na man nako ang karaan nako’ng   simpack.

“May cellphone ka diay?” Gipangutana ko ni James usa ka higayon niana nga naabtan ko niya nga nagdula sa akong cellphone.

“Oo,” matud ko. “Pero panagsa ra ni nako gamiton. Wa man sab ko’y teksan.”

“Ang imo diay’ng boyfriend?”

“Wa koy boyfriend. Ug kun duna man, segurado’ng mangita ko’g paagi nga mabugto ang among relasyon. Dili na ko angay niya kay hugaw na ko’ng pagka-babaye.”

“Ayaw pagsulti’g ingon niana, Jezebel. Dili mo kasal-anan ang nahitabo nimo.”

“Bisan na. Guilty gihapon ko, James.”

“Ang lalaki nga matuod nga nahigugma andam modawat sa imong pagka-ikaw, Jezebel.”

Wala ko motubay sa iyang gisulti.

“Tuod diay,” mipalain si James. “Nasayod na ba ang imong mga parents sa nahitabo kanimo? Ug nasayod na ba usab sila nga nia ka magtrabaho sa among panimay?”

“H-ha?” Nahakanga ko nga nakalitan sa iyang pangutana.

Kadali ra ko’ng nakabunlot og katarungan. Wala ko siya tug-ani sa tinuod kay dili ko gusto’ng  maugkat pa ang eskandalo  nga nahitabo sa akong pamilya sa Bohol. -- Sumpayan pa