Manapat kun estoryahan

Dear Tita Salie,

Maayong adlaw kanimo ug sa tanan nga tigbasahan og pasabta ko.

Duna lang unta koy ipangutana kanimo ug mangayo ko sa imong tubag mahitungod niining akong situwasyon ug suliran.

Dili pa ko minyo, Tita, apan duna ko’y kapuyo nga maoy naghatag nako og problema karon. Dili man gud ko ganahan, Tita, kay mogamit man siya og drugs. Nasayod ko nga dili gyud kini maayo kay maapektohan ang iyang utok. Pero kun ako siyang estoryahan manapat man siya dayon kanako.

Puwede ba siyang ipadakop dayon sa sunod nga dapatan ko niya. Unsa kahay maayo nakong buhaton? Palihog pasabta ko, Tita Salie. Daghang salamat.

* * *

Maayong adlaw,

Ayaw pagtugot nga yanohon ka lang og dagmal sa laing tawo. Ipaglaban ang imong katungod aron dili ka abusohan. Ayaw kalimot nga duna kita’y balaud aron manalipod kanato.

Sa panahon nga dapatan ka, ipamediko legal ang imong bun-og aron puwede nimo siyang ipadakop aron makiha. Kun makit-an nimo siyang nagamit og drugas o sa panahon nga mosuyop sila pagdali’g tawag dayon og polis o kaha magpatabang ka sa inyong barangay tanod. Ayaw itugot nga daghang tawo nga maamong unya sa ilang pagbadlong. Ug matakdan pa unya ang atong mga batan-on.

Kun nasayod ka nga duna siya’y dalang drugas, sa hilom pagtawag og polis aron madakop siya. Ayaw usiki ang imong kinabuhi nianang tawo nga dili na madala sa estorya.

-- Tita Salie