Ang hardener

Grabeng kasaba ang naangkon ni Benjie sa iyang amo. Hilabihang sukoa ni Don Victor dihang nahibaw-an niya nga may relasyon ang iyang hardenero  sa bugtong niyang anak nga babaye. Misamot iyang kasuko dihang nasuta niya nga mabdos ang iyang anak.

“Ikaw Carmela, wa nimo hunahunaa nga propesyonal ka, nanguyab la’g hardenero. Ug ikaw lalake wa ka mauwaw, unsay giapas mo sa akong anak?” ni Don Victor nga nagbaga ang mga mata sa kalagot.

“Apan Papa, si Benjie lang ang akong gihigugma,” pahayag ni Mela.

“Karong taudtaud muabot si kuya Paul mo gikan sa Manila, pagbantay  unsay buhaton niya nimo,” pahimangno ni Don Victor sa iyang anak.

Way tingog silang Carmela ug Benjie nga naghukdong sa ilang gilingkoran atubangan ni Don Victor. Gimahayan ni Don Victor ang  iyang kaugalingon nga midawat ni Benjie dihang miaplay kini isip hardenero. Nagduhaduha siya pagdawat sa sinug-danan tungod sa maayong personalidad nga gihuptan ni Benjie.

“Nyor, si Carmela maoy una ug katapusan kong higugmaon ug ipasalig ko nimo nga di kami higutman sa among pagpuyo,” pasalig ni Benjie ni Don Victor.

“Imong itugway akong anak sa plasa?” kantalitang pulong ni Don Victor.  Naundang si Don Victor sa iyang pangasaba dihang miabot ang iyang anak gikan sa Manila nga gisugat sa ilang drayber didto sa airport sa Bacolod. Mitindog si Benjie nga migakos ni Paul. Nahasiga ang mga mata ni Don Victor sa iyang nakita.

“Nakaila diay ka sa atong hardenero, Paul?” sukot ni Don Victor.

“Si Benjie, Dad, maoy suod kong barkada sa dihang nagtungha pa kami sa USC, didto sa siyudad sa Sugbo, sa kursong Accountancy.Wa lang siya makahuman kay may giluoran sa amahan.  Nakapamista ko sa ilang lungsod sa Alegria. Bugtong siyang anak sa adunahang pamilya,” ni Paul.

May matam-is nang pahiyom si Don Victor nga mitan-aw ni Benjie. (Katapusan)