I love you Tessa - Gula 7

Bisan og unsa na lang ang ilang gipanagsultihan ni Glenn ug Tessa. Hangtud nga miabot kini sa punto nga nagtug-anay sila sa ilang masi’g ka kaagi, sa ilang mga lovelife. Nahibaw-an ni Glenn nga wala pa g’yud diay makasuway og boyfriend si Tessa. Wala usab limdi ni Glenn si Tessa nga may girlfriend na siya kaniadto apan nagkabuwag sila.

Wala lang palandonga nga takulahaw lang nagkatagbo ang masi’g nila ka mga pagbati. Daw giganoy sila sa hilom sa ilang mga gitagoang pagbati. Naggaksanay sila si Tessa ug Glenn. Sunod nila nga naalinggatan nga nag-ukobay na ang masi’g nila ka mga ngabil.

Nagkainit ang ilang pagparayganay ug natental sila sa grabe nga kamingaw sa dapit nga ilang nahimutangan. Wala gayud motukol si Tessa diha nga giangkon ni Glenn ang iyang pagkababaye sa likud ra nga bahin sa payag samtang taliwala sa kangiob sa kagabhion.

Buntag na sila nga nakapadayon sa biyahe human matapaki ang mihiyos nga ligid sa ilang motorsiklo. Subo si Glenn nga nanamilit ni Tessa human niya kini mahatod kay wala’y cellphone si Tessa nga magkakontakay unta silang duha. Miabot ang laing Kalag-Kalag. Mibisita si Glenn sa lubong sa iyang inahan. Naglaom siya nga ikakita unta niya si Tessa nga moduaw usab sa lubong sa iyang inahan. Human si Glenn makahalad og pangadye sa lubong sa iyang mama, miadto siya sa lubong sa mama ni Tessa.

May lubong tupad sa nitso sa inahan ni Tessa. Gibasa niya ang lapida ug napasiga ang iyang mga mata pagkabasa sa ngalan “Tessa Talingting.” Gikulbaan si Glenn. Wala siya masayop, ang birthday sa namatay Disyembre 15 ug mao kini ang birthday ni Tessa. Namatay si Tessa Oktubre 20.

May miabot. “Naghandom tawon na si agaw nga ikakita niya ang iyang boyfriend karong Kalag-Kalag. Sa iyang kalipay, giatake sa kasing-kasing kay pareho sila’g sakit ug sa iyang mama.” Wala kapugngi ni Glenn ang pagtulo sa iyang mga luha. (Kataposan)