I love you Tessa

Gula 6

Nanakay sila si Glenn ug Tessa sa motorsiklo. “May motor ka man g’yud Glenn, maayo pa og mangadto na lang ta sa amo sa probinsya. Duha ka oras tua na ta didto. Alegre didto sa among dapit basta Nobiyembre 2 kay dunay kalingawan,” giingnan ni Tessa si Glenn.

Gitawgan ni Glenn ang iyang ig-agaw nga tag-iya sa motorsiklo ug nananghid nga gamiton niya ang motor pag-adto sa probinsya. Lipay kaayo si Glenn nga mitug-an ni Tessa nga misugot ang iyang ig-agaw.

Gikuha ni Tessa ang iyang bag sa balay sa iyang uyoan ug nananghid nga mopauli. Iya lang giingnan ang iyang tiyo nga mosakay siya sa last trip paingon sa ila sa Borbon. Tuod, sirit lang ang motorsiklo nga nagdagan sa karsada kay menos ra ang mga sakyanan.

“Mingaw kaayo no? Tua g’yud sa menteryo ang mga tawo karon kay ingon ani man g’yud sa probinsya ang petsa dos maoy daghan og tawo sa menteryo dili pareho sa siyudad nga bali… ang uno maoy daghang tawo,” ni Tessa pa.

Pag-abot nila sa tul-id kaayo’ng karsada sa Catmon, gipakusgan pa ni Glenn ang pagpadagan sa motor. Apan kalit lang nga miikid-ikid ang dagan sa motorsiklo. Gianam pagpahunong ni Glenn ang motor.

“Demalas Tess, na-flat ang ligid sa motor dapit sa atras,” giingnan ni Glenn ang dalaga. Wala sila’y nahimo. Mingaw kaayo ang dapit nga ilang nahimutangan.

Dunay tawo nga nahiagi kanila og mitug-an nga sa unahan adunay vulcanizing shop.

Giduot ni Glenn ang motor apan wala usab didto ang tigtapak sa ligid kay mipauli sa Bogo. Nakakita sila og tindahan sa unahan nga dili layo sa vulcanizing shop. Giduot nila ang motor didto.

“Kun dili pa tungod nako nga migalgal nimo Glenn, wala unta ka mahasol,” ni Tessa pa samtang nagtupad sila paglingkod. “Sagdi lang, swerte na usab kaayo nga naka-deyt ko nimo.” (Sumpayan)