I love you Tessa

Gula 5

Banag-banag na nga namiya sila si Glenn ug Tessa gikan sa menteryo sa Carreta. Nagkasabot sila nga mangaon na lang sa fast food restaurant sa eskena Gorordo ug General Maxilom Avenue.

Human nila’g pangaon, nananghid na si Tessa nga mouli na sa balay sa iyang uyoan sa Barangay Kamputhaw. Gihatod ni Glenn si Tessa ug naglakaw lang sila subay sa Gorordo Avenue paingon sa dalan Escario.

“Kanus-a ka diay mopauli sa inyong probinsya Tess?” gisukna ni Glenn ang dalaga. “Ugma sa kaadlawon ko mopauli,” matud ni Tessa. Nalipay si Glenn kay nakahuna-huna siya nga dapiton niya pagpanuroy dinhi sa dakbayan ang dalaga.

“Nakabisita ka na man g’yud sa lubong sa imong mama, mas maayo nga manuroy na lang ta karong gabii,” tanyag ni Glenn. “Sige, sige Glenn kay dili na ‘sab to magmahay si mama kay nagbuntag man ta didto,” sa dalaga pa.

Nagsabot sila si Glenn ug Tessa nga kuhaon niya ang dalaga inigkahapon. Wala na g’yud modayon si Glenn sa balay sa uyoan ni Tessa. Sa iyang pagbiya, mapahiyumon kaayo si Glenn nga dali ra niya’ng nasuod ang dalaga.

Pagkahapon, wala gayud sipyata ni Glenn ang pagkuha ni Tessa didto sa balay sa uyoan niini sa Kamputhaw. Nagpaantaw lang siya sa balay hangtod nga nakit-an siya sa dalaga. Mipahiyom si Tessa ug gisenyasan si Glenn nga pahuwaton kadiyot.

Tuod, wala madugay nakita ni Glenn nga migawas na si Tessa sa balay ug gisinyasan siya nga mosunod sa unahan. “Wala ko magpakita ni tiyo nga may kauban kay lainon unya og sabot sa akong uyoan,” matud ni  Tessa.

Mihapit na lang sila sa menteryo og kadiyot, dayon nanggawas aron manuroy. Lingaw kaayo sila si Glenn ug Tessa. “May boyfriend ka na ba Tess?” gisukna ni Glenn ang dalaga. (Sumpayan)