Napikot si Tasyo

Ikaw Tasyo matagbaw g’yud ka anang pagkadukirok mo sa mga babaye. Moabot g’yud unya ang panahon nga mapunta  ka sa babaye nga biyuda ug daghang mga anak,” pahimangno ni nanay Doray usa ka buntag niana ngadto sa iyang anak.

Wala lang manumbaling si Tasyo niini kay nanudlay siya sa iyang buhok human sa kaligo.

Nipadayon si nang Doray, “maayo gani ko kay usa ra ka sa pagkabiyuda nako kang tatay Selmo nimo.”

Mitubag si Tasyo, “mao g’yud ning ulitawo nay Doray maglipay-lipay g’yud samtang buhi pa ta ning kalibotan.”

Usa ka hapon niana samtang nagharos sa kamunggay si Doray diha sa ilang kayda nahakurat siya kay nagwara-wara man og hait kaayong pinote dapit sa ilang koral nga kawayan si Teban, “Doray hain ang imong anak nga si Tasyo kay tagodtagoron ko siya kay iyang gidaginot og esmiringhoy ang akong anak nga si Dayang. Kinahanglang makasal sila ugma sa buntag didto sa munisipyo kay kun dili puy-an ko ang Muntinlupa ining hitaboa!”

Wala katingog si Doray igo lang siya nga naglantaw kang Teban nga dayong talikod nga nagpangusmo   sa hilabihang kapungot balik sa iyang agi. Pilay estorya, nakasal g’yud si Tasyo ug Dayang pagkaugma sa ilang munisipyo.Human sa kasal, nagkanayon si Tasyo ngadto sa inahan “husto g’yud ka nay Doray napunta hinuon ko sa biyuda nga lima ang mga anak gagmay pa ra ba.” (Kataposan)