Wala magkasinabot

Dear Tita Salie,

Hello! Good day. Nagpadala ko niining akong sulat suliran mahitungod sa akong kinabuhi isip usa ka inahan apan dili asawa. Manghinaot unta ko nga imong kahatagan og pagtagad ug imo kong mapasabot sa angayan nakong buhaton.

Tagoa lang ko sa ngalan nga Jaicah. May usa kami ka anak sa akong kapuyo sa una. Apan tungod lagi kay wala mi magkasinabot sa amahan sa akong anak nagkabulag gyud mi.

Sa pagkakaron ania nako ang among anak. Pait kaayo ang among kahimtang tungod kay aduna pa man koy anak nga gibuhi ug wala koy maayong panginabuhi.

Ang akong pangutana, Tita Salie, ug gusto nakong pangayoan kanimo og tambag mao nga puyde ba ko mangayo og sustento sa amahan sa akong anak bisan kun wala mi makasal? Nagduhaduha pa man gud ko kay tingali unya kun kataw-an ra ko niya. Palihog pasabta ko, Tita Salie. Thank you.

* * *

Maayong adlaw usab Jaicah,

Ayaw kaulaw nga moduol sa amahan sa imong anak aron sa pagpangayo’g suporta o sustento kaniya tungod kay duna siya’y tulobagon diha nimo. Duna gyud siyay responsibilidad nga suportahan ang bata kay iyaha man kining anak.

Ug dili gyud siya makabalibad niini kay puyde man nimo siyang kasohan kun ugaling magdumili siya.

Adtoa siya ug hangyoa nga hatagan niya og sustento ang inyong anak. Kun nagtrabaho siya puyde kang moduol didto sa ilang head or sa ilang HR or Human Resource Department ug imong isulti ang inyong kahimtang. Puyde ka usab magpatabang didto sa inyong barangay aron silay motabang kanimo aron i-settle ang inyong problema.

Bisan kondili kamo kasal, bisan man kun pamilyado na ang maong lalaki duna gyud siyay responsibilidad sa bata kay iyaha man kining anak, ug iyang tulobagon ang pagpadako kaniya. -- Tita Salie