Ang manalagna

Natumog sa singot ang kalawasan ni Reykoy bisan pa sa kabugnaw sa kagabhion. Aduna nay giladmon ang gikawot niyang gahong. Lapaw na kini kaniya. Namasin siya nga makoykoyan ang lubnganan ni Inse Dorika, ang bantugang albularyo ug manalagna sa wala pa ang ikaduhang gubat sa kalibutan.

Kining kabahin kang Inse Dorika napaminawan lang niya sa mga asoy sa iyang apuhan nga si anhing Lola Feran. Mga bata pa silang gagmay niadto nga mag-alirong sa ilang apuhan, samtang magsugilon kabahin kang Inse Dorika.

“Pagpanambal, himalad, pagpanag-an, hitupngan man tingali apan di gyod hilabwan kadto si Dorika,” paghulagway ni Lola Feran kabahin sa abilidad ni Inse Dorika.” Diha man gani to’y usa ka higayon nga nagpasidaan siya kanamo kay molinog kuno’ wa dangtig salop sa adlaw nahitabo gyod.”

Apan ang dili niya hikalimtan kadtong kaheta nga tumbaga nga giapil og lubong dihang namatay si Inse Dorika. Bisan ang iyang apuhan nagduda nga bulawan kadto.

Usa to sa iyang gipanugon dayong kabugto sa iyang ginhawa lab-as pa sa pangdungog ni Reykoy kining mga pulonga gikan kang Lola Feran nga kadtong maong kaheta anha gyod itupad kaniya sulod sa lungon. Ug ang ikaduhang tugon mao nga anha siya sa iyang yuta magpalubong.

Ang pangindahay nga masapian maoy nagtukmod kang Reykoy sa pagkobkob sa lubong sa tigulang manalagna.

Taud-taod diha siya’y naduslakan nga sa bana-bana ni Reykoy mao na gyod kadto ang iyang gipangita. Ug pinaagi sa emergency light natataw niya ang tumbaga nga kaheta tupad sa kalabera. Daw sa milukso iyang galamhan human niyang punit sa maong kaheta.

“Madato na gyod ko ani,” misinggit iyang huna-huna.

Wa maglangan ug giablihan dayon kini ni Reykoy apan dako ang iyang kabawo kay wa gyu’y bulawan nga iyang nakaplagan. Naniga hinuon iyang mga mata pagkabasa niya sa papel nga mao ray sulod sa kaheta ug wa madugta.

“Karong gabhiona mao ang imong katapusan tawo nga mapangahason nga mikubkob sa akong lubnganan!”

Halos molupad ang espiritu ni Reykoy sa kalisang. Mogawas unta siya sa gahong apan ulahi na ang tanan kay ang bato nga susama kadako sa balay nga diha sa duol kalit lang nga naligid ug maayong pagkatabon sa gihimo niyang gahong. Maayong pagka-ipit ni Reykoy didto sa sulod sa gahong ug maoy hinungdan sa iyang kamatayon. (Katapusan)