Alang sa kaugmaon ni Lisa...

Sa  iyang programa nga Hugyaw, si Mar nagkanayon sa iyang pasiaw sulod sa estasyon DYRC.

“Hala, mga kabit sa kahanginan, pahiluna na kamo kay sugdan na ang atong tulomanon...!”. Misunod dayon ang sonata. Mibagting ang telepono ug gipunit ni Mar.

“Hello, kinsa man ‘ni...?” Nangutana siya samtang nag-atiman sa iyang programa.

“Si Mar baya..., nagpatuyang lang. Lisa kini oyyyy..!” Tubag sa telepono.

“Oy, Lisa..! tutoki lang, di ba mosampila ka nga mora’g tabanog.” Tubag pasiaw ni Mar sa telepono. Unya, sa intermission mibanus sab ang propaganda.

“Mar, gusto kong magkita ta sa Toledo City karong Sabado sa udto kay pista.

Adto lang maniudto sa balay. Bayente dos ang akong edad ug magsul-ob ako’g pula nga may giringgiring sa ubos. Ayaw kalimti ang akong imbitasyon, ha..!”

Naglibog si Mar unsay itubag labut sa iyang pangidaron nga kapin na ra ba sa singkuwenta ang iyang panuigon. Misantop sa iyang ulo ang pagpamakak.

“Okey.., bayente kuwatro ang akong edad ug labaw la’g duha ka tuig. Magsul-ob sad ko’g barong, taason, ug medyo kuloton ang buhok, okey..?” Pamakak ni Mar sa telepono.

Adlaw’ng Sabado, day-off ni Mar ug nananghid siya sa unom niya ka anak ug asawa nga muadto sa Toledo sakay sa iyang kotse. Nadani lang si Lisa sa tingog ni Mar nga medyo pagawpagaw apan larino kaayong molitok sa mga pulong labi na sa Binisaya.

Pag-abot niya sa Toledo, nakita ni Mar nga may babaye nga nagbarug sa plasa nga nagsul-ob pula nga sinina nga may giringgiring sa ubos. Miliko siya sa unahan nga wa himatikdi ni Lisa.

“Day, asa ang dalan paingon sa Sugbo..?” Matud pa ni Mar sulod sa iyang kotse.

“Subay lang sa dalan ug pagtangka  sa eskina, liko sa may tuo. Mao na kana ang dalan padulong sa Sugbo, Noy..!” May gitudlo si Lisa kang Mar.

“Salamat.., mora’g duna ka’y gipaabot, di ba?” Pasumbingay ni Mar ngadto kang Lisa nga nagtan-aw sa unahan.

“Molang, taga-radyo,  Noy...!” Mikulismaot ang dagway ni Lisa nga mitubag. Ug mipadayugdog si Mar sa unahan nga nagkanayon sa iyang kaugalingon.

“Di ko buot patyon ang imong kaugmaon. Pangita Lisa nga sama sa imong edad alang sa hayag mong ugma damlag...!” Tuaw ni Mar samtang nagpadagan sa iyang kotse.

Sa ilang balay, nagpaabot ang mga anak ug buotang asawa ni Mar alang sa panihapon. (Katapusan)