Pangandoy sa kasingkasing

Si Turo ug Brenda nagtubo sa bukid sa managlahing kahimtang. Si Turo sa ginikanang mag-uuma. Samtang si Brenda sa ginikanang negosyante. Apan bisan pa niana managsuod sila. Gani gikan sa elementary hangtud high school kanunay silang magkuyog padulong ug pauli sa tunghaan.

Tungod niini adunay talagsaong pagbati nga migitib sa kasingkasing ni Turo apan wala kini niya ikapadayag tungod sa kahadlok nga kapakyasan lang ang iyang maangkon.

Si Brenda mipadayon sa pagtungha sa kolehiyo ug nahimong magtutudlo. Samtang si Turo nagpabilin sa bukid kay para niya kontento siya sa kinabuhing bukidnon. Dinhi gitahasan siya sa iyang amahan pagtikad sa ilang yuta nga kasikbit sa uma sa iyang amahan. Gitamnan niya og mga lagutmon, utanon, ug bungangkahoy. Namuhi usab siya og kahayopan.

Samtang si Brenda nagtudlo sa usa ka publikong tunghaan sa lungsod. Mopauli lang siya sa matag Biyernes sa hapon. Tungod lagi kay pit-os ang dalan mapugos siya pagbaktas og mga lima ka kilometros agi sa payag ni Turo.

Karong hapona nagbaktas si Mam Brenda sa dalan gibati niya ang kabalaka basin sa dili pa siya kaabot sa ilang balay mobundak ang ulan. Ang kalangitan gitabunan sa mabagang dag-om pun-an pa sa kilat ug dalugdog nga maoy nakapalisang kaniya. Tuod man igo lang siya nakatungod sa payag ni Turo mibundak ang makusog nga ulan inubanan sa kilat ug dalugdog.

“Tur mopasilong una ko sa imong payag ha mintras dili pa motuang ang ulan.” Pakiluoy ni Mam Brenda.

“Aw o Bren dayon diri sa akong payag.” Agda ni Turo kang Brenda.

Migabii na lang wa gyud mituang ang ulan kilat ug daluglog. Didto nakatulog si Mam Brenda sa payag ni Turo. Pagkabuntag sa dihang nasayran sa amahan ni Mam Brenda nga didto siya nakatulog sa payag ni Turo grabing sukoa niini.

“Brenda kinahanglan magpakasal kamo ni Arturo kay kun dili gani utangon nako ang iyang kinabuhi.” Bahad sa amahan ni Mam Brenda.

“Apan pa dili mi uyab ni Turo, gawas pa way nahitabo namo kagabii.”

“Way nahitabo? Nag-unsa man diay mo? Nagbitok-bitok.” Nakasal si Brenda ug Turo nga kagustuhan  sa iyang amahan apan pangandoy usab sa ilang kasingkasing. (Kataposan)