Driving teknik

Gula 6

Pagkaugma, gituman gayud ni Marie nga didto na sila nag-driving si Norman sa Trans-Central Highway paingon sa Balamban. “Gusto ko nga makasuway pag-drive sa bukid kay human na man ko dinhi sa siyudad,” matud ni Marie.

Tulin kaayo nga gitadlas ni Marie ang kabukiran paingon sa Balamban. “Hala, kasanaw sa kinaubsan uy,” nakatuaw si Marie diha nga milapas na sila sa Barangay Tabunan ug naglugsong na paingon sa Balamban. Nakita na nila ang dagat nga nag-uwang sa Cebu ug Negros.

“Hinay-hinay lang sa imong paglugsong Mar kay bahada ra ba kaayo,” pahimangno ni Norman sa iyang student driver. “Thanks for the reminder Norman,” matud ni Marie dungan sa pagpahiyom. Tuod, miabot sila sa kinaubsan.

“Maniudto na lang ta’ng daan Norman kay lami kuno kaayo ang liempo dinhi sa Balamban,” ni Marie pa nga mi-parking sa kotse atubangan sa usa ka kan-anan. “Maayo ka na g’yud nga mo-drive Mar. Wala ka na magkinahanglan og driving instructor,” matud ni Norman.

May miabot nga kustomer sa kan-anan. Mingisi kini kang Marie. Mitindog si Marie ug mibiso-biso ngadto sa babaye nga may pagka insikon. Nakabantay si Norman nga mipasiklap ang babaye kaniya. “Kumusta na ang imong buotan nga cousin? Ingna nga nakakita na ko’g ilis kaniya,” giingnan ni Marie ang babaye. Miyango-yango ang insikon nga babaye diha’ng gitudlo ni Marie si Norman nga mihunong sa iyang pagkaon. Nakalitan si Norman sa gihimo ni Marie nga gipaila siya nga maoy lalaki nga gipuli sa iyang bana.

Hinuon, nahuna-huna ni Norman nga kun matinuod, suwerte siya kay gawas nga kuwartahan si Marie, makabibihag kini og panagway. Taud-taud mibalik si Marie sa lamesa nga nagngisi. “Ayaw’g saba Norman, gipaila ko ikaw nga akong boyfriend sa ig-agaw sa akong ex-husband aron motug-an.”

“Walay problema Mar, malipay pa gani ko nga giangkon nimo nga boyfriend. Bisan pa’g tinud-on,” ni Norman nga nagngisi. (Sumpayan)