Driving teknik

Gula 3

Human mapasabot ni Norman si Marie kun unsaon pagpadagan ang sakyanan ug unsaon nga dili siya mapagngan sa makina, gipawong niya ang makina ug nanaog si Norman sa sakyanan.

Magbaylo na sila og lingkoranan kay si Marie na ang mo-drive sa kotse nga training vehicle sa Easy Driving School. Human makapahiluna sa ilang mga lingkoranan, giingnan ni Norman si Marie. “Sige, switch on.” “Clutch, then kambyo premiera, unya hinay og release ang clutch,” dugang instruction ni Norman. Gituman usab dayon ni Marie ug misugod na pag-aginod ang kotse. “Kalma lang ha, ayaw lang kaayo tamaki ang gasolinador.. segunda, unya next gear,” nagpusot-pusot ang mga order ni Norman.

Ingon sa wala na g’yud tuod maglisod si Norman sa pagtudlo ni Marie kay may kasinatian na man kini nga mo-drive og motorsiklo. “Hala, ka-enjoy diay mag-drive og kotse uy, Norman,” ni Marie.

Swerte kaayo sila kay sanglit buntag pa, wala g’yud kaayo’y mga sakyanan ang karsada sa north reclamation area. Kun maudto-udto na, mga trak de karga nga maghakot og mga kargamento maoy sagad moagi sa mao nga karsada nga ilang gibansay-bansayan pagmaneho.

“Ihunong sa daplin sa karsada kanang landong kay duna ko’y dugang instruction,” matud ni Norman. Gituman ni Marie ang gisulti sa iyang driving instructor. “Buyno, kamao-mao ka na mopadagan, ang angay lang nimo i-improve mao nga hinay lang inigliko ug inigtamak nimo sa brake kinahanglan nga dili maumod ang sakyanan,” ni Norman.

Gimandoan na usab si Marie sa pagpadagan sa sakyanan. Dunay lawom nga libaong mao nga mitaas ang tingog ni Norman. “Brake! Libaong!” ni Norman. Apan imbes brake ang tamakan, nasipyat ang tiil ni Marie ug ang gasolinador maoy iyang natamakan.

“Hu! Ayaw!” gidali ni Norman paglubag ang manobela aron malihayan ang libaong. Wala tuyoa nga ang bukton ni Norman nabag-id sa dughan ni Marie. (Sumpayan)