Driving teknik

Gula 2

Misakay si Marie didto sa passenger’s seat sa kotse nga gamiton nila ni Norman sa pagbansay-bansay pag-drive. “May ideya ka na ba ma’am unsaon pagpadagan ang usa ka sakyanan?” gipangutana ni Norman si Marie. “Mora’g ang pagdala sa makina sama ra man tingali sa mag-drive og motor? Kamao ko nga mopadagan og motor apan sa awto wala pa g’yud ko makasuway’g drive,” giingnan ni Marie ang driving instructor nga si Norman.

Mipahiyom si Norman kay nasayod siya nga sayon ra’ng tudloan pag-drive si Marie. “Adto lang ta sa north reclamation area mag-praktis ma’am kay nindot didto dunay karsada nga wala kaayo’y mga sakyanan nga moagi,” matud ni Norman, dayon niya nga padagan.

“Tawga lang ko sa akong ngalan nga Marie, ayaw na pagtawag nako’g ma’am,” giingnan ni Marie si Norman. “Sige,” matud ni Norman nga mipahiyom. Giingnan usab ni Norman si Marie nga usahay dili baya kalikayan nga ang kamot sa instructor mabag-id gayud sa lawas sa iyang gitudloan og drive sa tanto nga pagdali-dali.

Tuod, wala madugay didto na sila sa North Reclamation Area habig sa Mandaue City. Dili kaayo nindot ang karsada apan lapad ug walay mga mangagi nga sakyanan. Gipahunong ni Norman ang kotse daplin sa karsada ug gihatagan niya’g ideya si Marie unsaon sa pagpadagan ang sakyanan.

Gitudloan usab niya unsaon nga dili mapawong ang makina ini’g tamak niini sa brake ug unsaon sa pagpangambyo. Wala niya pahibaw-a si Marie nga sa passenger’s seat sa training vehicle sa driving school adunay sekreto nga brake nga mahimong magamit dayon sa instructor panahon sa emerhensya.

Gihatagan usab ni Norman og gamay’ng refresher course si Marie kabahin sa traffic lights ug kun asa ipahimutang ang sakyanan kun kini moliko sa tuo ug sa wala nga bahin sa karsada. (Sumpayan)