Mga kabilin

Nakadayeg si Tikoy sa iyang hinigugma nga si Magna, tungod kay gihatagan siya og mahalong singsing atol gayod sa iyang adlaw’ng natawhan. Gani gihagkan pa siya ug nisaad nga pakamatyan ang maong gugma. Bisan ang amahan sa iyang hinigugma nga gidungog nga anak sa ungo ug ang inahan anak sa barangan, iya kining gipaka way bili. Kay para kaniya ang gugma dili mupili bisan unsa.

Untop alas 3:00 sa hapon padulong si Tikoy sa pinuy-anan sa iyang hinigugma. Apan sa kalit lang may naglumbaanay sa pagdagan ang mga tawo. Ug nakita niya ang usa ka hamtong lalake nga gidunggab. Tungod sa iyang kaluoy gihulbot ang kutsilyo gikan sa maong tawo. Unya nidagan ang nagdunggab.

Wala palandunga nakita siya sa nagpatrolya nga polis ug naalaan siyang nagpatay. Sa laktod napriso si Tikoy nga wala’y sala.

Dinhi nagsugod nga mubawos ang iyang hinigugma. Kay sa pipila lang ka gutlo ang nilabay sa pagka priso ni Tikoy, kusog pa’s kilat ang balita.

Kay adunay tawo nga niburot ang tiyan ug daghang pinaakan sa mga mala nga mananap. Nagduda si Tikoy nga ang nihimo niini mao ang iyang hinigugma.

Pila may dagan sa panghitabo alas 10:00 sa gabii nidagsa ang mga putyokan didto sa prisohan. Apan nahibulong si Tikoy nga adunay nagbinugtong nga usa ka dakong iro nga niduol kaniya.

Ug mingsiga ang iyang mga mata kay nagkanaam og kausab ang bayhon ngadto sa tawo. Ug dili siya makatuo kay si Magna man diay ang iyang hinigugma.

Wa magdugay, wala’y aso nga makumkom kay ang tinuod nga nagdunggab, nitahan lang sab dayon. Ug nanglurat ang mga mata ni Tikoy sa iyang nakita, kay ang tawo nga nitahan puwerting dakoa sa tiyan ug ningbutoy ang tibuok kalawasan. Unya gibuhian dayon si Tikoy ug nihilak atubangan sa iyang hinigugma.

“Magna, motuo nako nga gimahal mo ako! Ug klaro kaayo nga ikaw ang nitabang nako!” ni Tikoy.

“Tikoy, bisan unsaon nako pagbalibad sa imong pasangil, molutaw gyod ang tinuod. Prangka pagka estorya ... mahal nako ang akong mga ginikanan.

Mao nga dili nako balibaran ang ilang mga gipanghatag nga mga kabilin,” pasabot ni Magna dalang gunit sa mga kamot sa ulitawo. (Kataposan)