Kadtong bulak ni Lolita

Nindot kaayong sud-ungon ang mga bulak sa tanaman ni Lolita nga nahimutang sa may kilid sa ilang balay. Klase-klase lang ang mga bulak nga naa sa iyang tanaman. Liwat si Lolita sa iyang Mama Magda nga mahiligon sa mga bulak.

Sa wala pa mamatay ang iyang mama  nagtukod kini’g usa ka flower shop didto sa may luna nga napalit sa iyang papa Manuel. Daghan na kaayong nakigsuki kang Magda ug sa panahon nga dunay birthday sa iyang mga suki o di ba sa panahon sa Valentine’s Day anha gyud dayon mamalit og mga bulak sa flower shop nilang Lolita ang ilang mga suki ug ingon man ang dili nila suki.

Ganahan gyud sila sa mga maanindot kaayong mga bulak sa tanaman o flower shop ni Magda. Karon si Lolita na ang nagdumala sa flower shop. Duna siya’y kaabag nga ulitawo nga ginganla’g Asisclo.

Kini si Asisclo nag-alagad sukad pa kang Magda ug karon nga si Lolita na ang nag-manage sa flower shop anaa pa gihapon siya. Sa hilom dunay gusto si Asisclo kang Lolita. Puti ug nindot kaayo’g lawas ang dalaga.

Mao nga usa ka gabii niana may mikalit pagsulod sa lawak ni Lolita ug gipanamastamasan ang iyang pagkababaye. Kay ngitngit sa lawak, wala mailhi ni Lolita ang lalaking miamong-among kaniya. Tungod kaha tingali sa kaguol, mihigos si Lolita ug usa ka hapon niana iyang gipatawag si Asisclo.

“Asisclo, ikaw ang milugos nako, di ba?” ni Lolita pa.

“Ha-ha, di...dili ako, uy, Ma’am Lolita, dili ako!! nangluspad si Asisclo.

“Asisclo kutloi ra ko’g buwak, kanang rose, dali kay magpaabot ko...” ni Lolita pa nga misugo kang Asisclo.

Taudtaod diha na si Asisclo nga dala na ang bulak nga rosas.

“Nia na, Ma’am, o, ang giingon mong bulak,” ni Asisclo nga midunol kang Lolita.

Unya mihawokhawok si Lolita sa bulak ug miingon, “Asisclo, ang imong kasingkasing sama niining rosas, di ba, busa, kini ang buhaton ko nimo,” ug milagbas ang tag-as nga kuko ni Lolita sa walang dughan ni Asisclo tumong sa iyang kasingkasing ug sa pagbalik pa sa kamot ni Lolita dala na ang kasingkasing ni Asisclo. “Aghhhhh...Ma’am, ang   akong kasingkasing...” ug natumba si Asisclo ug maoy mabati ang lanog nga katawa ni Lolita ug diha sa dughan ni Asisclo nagpatong ang bulak nga rose nga nagkadugo nga gipahiluna ni Lolita ungo. (Kataposan)