Jezebel
Gula 53
Wala gyud intawoy kalibotan ang akong mga ginikanan nga mosulod si Edward sa akong kuwarto magabii kay nag-amping man gyud mi nga dili nila mamatikdan.
Tungod ba kaha kay nalingaw mi si Edward sa tinago namong binuhatan, ingon sa wala lang namo mamatikdi ang pagpanglabay sa mga adlaw. Miabot ang adlaw sa among graduation sa high school. Mipaso kami ug midawat sa among dimploma.
“Asa ka moeskuwela?” Gipangutana ko ni Edward samtang kami nangaon atol sa among graduation ball.
“Tagbilaran,” maoy akong tubag. “Accountancy ang kuhaon nakong kurso kay maoy gusto nilang tatay ug nanay. Ikaw? Unsa may kuhaon nimong kurso?”
“Criminology. Sa Tagbilaran gihapon ko moeskuwela. Magkita gihapon ta kanunay.”
“He-he! Lain gyud og dagan nang imong utok, da.”
“Pasagdi lang gud ko kita bitaw’ng duha ang malipay.”
Nahilom ko. Misantop sa akong hunahuna nga kun mag eskuwela na kami si Edward sa Tagbilaran, makalugar na gyud kami kanunay.
Nagsingabot na ang tingbukas sa klase. Miadto ko sa Tagbilaran aron magpa-enroll. Nagkasakay kami si Edward sa bus paingon sa Tagbilaran. Magpa-enroll usab siya sa college apan managlahi kami’g eskuwelahan. -- Sumpayan pa
- Latest
