Ako kaha ang amahan?

Dear DJ Inday Misyel,

Ako si Joven, 25 years old. Naproblema ko karon kay mabdos ang akong uyab pero dili ko sigurado kun ako ba g’yud ang amahan sa bata nga iyang gisabak. Unsa may angay nako’ng buhaton? Dili man ‘sab siya gusto magpa-check up. Unsaon nako aron mahanaw ang akong pagduda kay may kanhi uyab man gud ni siya ug duna gihapon sila’y kumunikasyon. Apan bisan pa man niini, gimahal ra gihapon nako ang akong uyab. Palihug tambagi ko. 

Dear Joven,

Bahin sa ilang communication, mas maayo nga imo sila’ng panid-an pero ayaw pagbuhat og dautan kun tinuod man. Ikaduha, ipahiling ang pagmabdos sa imong uyab aron mahibawo ka sa tinuod. Dali ra ni kay ibasi man kini sa buwan gikan sa inyong pag-contact ug labina mahibawo ka sa kahimtang sa iyang pagsabak ug sa bata. Kun dili man tukma ang buwan sa iyang tiyan sa pagsabak, andama ang imong kaugalingon, estoryahan ninyo’ng duha kun unsay angay’ng himuon. Kun tukma gani ang iyang gisabak, sige ipadayon ug mahala pa siya uban ang gisabak ug paningkamot aron mapangandaman ang iyang pagpanganak. Ikatulo, sultii ang imong GF nga hunongon na niya ang kumunikasyon sa kanhi niya uyab aron magmalipayon mo. Kun dili siya musugot, desisyonan ninyo ang inyong relasyon. - DJ IndayMisyel