Bunga sa kalooy

Gula 2

Miduol ang tulo ka babaye nga kauban sa bakla ngadto sa awto ni Ronnie. “Pagpili sir kon hain kanila’ng tulo ang gusto nimo nga i-deyt karong gabhiona,” giingnan si Ronnie sa bakla nga mibugaw na sa tulo niya ka kaubang babaye. Gitagsa-tagsa pagtan-aw ni Ronnie ang tulo ka babaye apan didto gayud masangit ang iyang panan-aw sa babaye nga nagpahipi lang sa duha niya ka kauban nga maoy nagpabantang aron mapilian. “Asa ang imo kanilang tulo sir?” matud sa bakla.

“Unya, kon mopili ko ninyong tulo, inyo g’yud ko nga lipayon?” gipangutana ni Ronnie ang mga babaye nga pulos nagpahiyom nga nagtan-aw kaniya. “Of course, lipayon g’yud ka namo sir aron mahigalam ug magbalik-balik,” hapit magkadungan ang duha ka babaye sa atubangan.

Apan naminghoy sila dihang giingnan ni Ronnie nga ang ilang kauban nga manggiulawon ug nagpahipi sa luyo maoy iyang nagustohan. Nagdungan kini sa pagbiya ug milakaw sa unahan aron mangita na usab og kustomer.

“Suwerte ka g’yud day nga ikaw ang napilian ni sir kay makita sa hitsura ni sir nga buotan siya ug dili tihik,” matud sa bakla nga mora’g miulog-ulog kang Ronnie.  Gipasakay sa bakla ang babaye sa sakyanan ni Ronnie.

“Star ang iyang ngalan sir. Kuhaon lang nako daan ang one thousand pesos sir aron manglakaw na mo,” giingnan sa bakla si Ronnie. “Mosugot ka ba nga makigdeyt nako karong gabhiona Star?” gisukna ni Ronnie ang commercial sex lady. Igo lang kini nga mitangdo. Gikuot ni Ronnie ang iyang pitaka ug mikuha siya’g tibuok P1,000 ug gihatag niya kang Star. Gitunol usab dayon ni Star ang kuwarta ngadto sa bugaw. Mipadagan na si Ronnie sa iyang kotse ug nasayod na siya kon asa sila mangadto ni Star karong gabhiona. (Sumpayan)