Chocolate

Human nila og pangaon sa food court sa department store, nagbuwag-buwag sila si Larry ug Charisse. Sa wala pa molakaw si Charisse, nagbilin kini og salabtonon kaayo nga tinan-awan kang Larry dungan sa pag-ingon “See you next time Lar.”

Igo lang gisundan sa paglantaw ni Larry si Charisse. Wala magmahay si Larry nga gitabangan niya ang dalaga tungod kay maoy mipasuwabe ang iyang kaluoy nga kon dili niya matabangan, sigurado nga matanggong kini sa bilanggoan.

Nakasabot si Larry sa gibati ni Charisse. Wala kini trabaho ug nagsalig lang sa gamay’ng kinitaan sa iyang amahan nga nagtrabaho isip construction worker. Dihang wala na makita ni Larry ang bayhon ni Charisse, misulod siya pagbalik sa department store.

Giadto niya si Arante, ang higala niya nga pangulo sa mga private detective. “Bilib kaayo ko nimo bai Lar kay wala g’yud ka maanoguni sa imong kuwarta pagbayad sa obligasyon niadtong babaye. Pero guwapa ‘sab to bai uy, suwerte kaayo ka ato,” matud ni Arante nga nagngisi.

“Pyor nga tabang ra kadtong ako bai Arante kay wala gani ko masayod kon magkita pa ba kaha mi. Unsaon nga wala man ‘sab siyay contact numbers, wala man selpon,” ni Larry pa.

 Milabay ang mga adlaw. Paggawas ni Larry sa trabaho usa ka adlaw’ng Sabado, gisugat siya sa guwardiya. “Dunay naghuwat nimo sir Lar,” sa guwardiya pa. Miliraw dayon ang mga mata ni Larry pagpangita sa naghuwat kaniya.

“Kinsa man? Asa?” iyang gisukna ang guwardiya. “Tua sa gawas sir, mamolds man to kaayo sir, wala pa man to’y 20-anyos,” giingnan sa guwardiya si Larry. Tuod nakita ni Larry nga ang babaye nga naghuwat kaniya mao si Charisse.

Mikalit lang pagkulba ang dughan ni Larry kay wala siya makasabot sa iyang gibati nga nakita niya pag-usab si Charisse. (Sumpayan)