Sulagma

Gula 6

Human sa daw makabungog nga dugdog, misugod dayon ang pagtaligsik. Nagkakusog ang taligsik mao nga gipaspasan nila ni Rex ug Marian ang paglakaw. “Hala, wala pa ra ba’y kapasilongan dinhi’ng dapita Rex,” ni Marian.

Nagkakusog ang ilang mga lakang, apan nagkakusog usab ang taligsik. Wala na nila kapugngi ang pagdagan ug takulahaw lang nga may nasigpatan sila nga kinutkotan og anapog nga diha sa daplin ra sa karsada nga nahisama og gamay’ng langob.

Didto sila mipaingon aron makapasilong ug dili mabasa pag-ayo. Pareho sila nga naghangos tungod sa taas-taas g’yud nga distansya nga ilang gidagan. “Gidemalas man ta Rex, giuwan ang disco nga ato unta’ng tambongan,” matud ni Marian.

“Mao lagi. Apan sagdi lang og gidemalas ang pagtambong nato sa disco kay gidebuynas man ‘sab ko kay gikauban ko ikaw Mar dinhi sa mora’g gamay’ng langob,” ni Rex pa. Dayon, takulahaw lang nga nangahilom silang duha.

Ingon sa nagpaabot ang usa’g-usa kon kinsa ang mobuak sa kahilom tali kanila. Unya, kalit lang milanog ang kusog kaayo nga liti ug dugdog nga misunod sa hait kaayo’ng kilat. Wala tuyoa ni Marian nga napagakus siya kang Rex sa kahadlok.

Abtik usab kaayo si Rex nga migakos kang Marian. Ang kalumoy sa lawas ni Marian nga nagakos ni Rex inanay nga nakapatingkag sa iyang kahinam. Nagbuto-buto ang dughan ni Rex ug nakahuna-huna nga kini na ang tukma nga higayon nga daygan niya si Marian sa iyang gibati.

Laing masipa nga dugdog ang ilang gibati mao nga wala na gayud matangtang pa ang mga bukton ni Marian nga migakus kang Rex. “I love you Mar,” matud ni Rex. Wala na magpaabot og tubag si Rex, iyang gihagkan si Marian. (Sumpayan)