Lalim ba?

Wa na’s maayong panghunahuna si Mildred nga nilabang sa karsada. Mura’g wa na’s kaugalingon. Kay nasuta  na niya ang teks gikan ni Raymond nga iyang uyab. Alas sayis ron sa buntag. Nag-unipormi na siya. Ready na moadto sa University of San Sebastian diin nagtungha siya og Accountancy.

Nilabang siya’s karsada ngadto’s atbang sa ilang balay aron pagpalit og load. Unya, nagkateksanay dayon sila ni Raymond.

Niurong si Mildred sa centerline sa karsada pagbalik niya’g labang. Kay daghan pang sakyanang nangagi. Di pa siya kalabang. Highway man sa Bahak, Liloan iyang gilabngan. Ug may multicab nga may pipila ka mga pasahero, niurong sa daplin sa karsada kay nakaila ang drayber sa iyang unipormi nga usa ka estudyante kinsang tunghaan maagian sa rota sa multicab.

Dugay nga nakalabang si Mildred kay nagpusotpusot ang mga sakyanan. Kay wa sa tarong hunahuna, wa siya kamatikod nga siya diay ang gihuwat sa multicab. Dihang nakalabang na siya, niurong siya sa daplin. Nagbarog og padayong nakigteks ni Raymond. Mao pay pagkamatngon niya nga gihuwat diay siya. Ug mao pay pagbalibad niya human sa duol diyes minutos nga inurong sa sakyanan.

“Wa man lang ka nibalibad day, sa diha ka pa’s tunga’s karsada!” reklamo sa drayber.

“Way konsiderasyon!” pulong sa usa ka pasahera.

“Mura’g bungol!” sa usa ka lalaki.

“Daw amang!” sa usa ka babaye.

Nadungog ni Mildred tanan una nilarga ang multicab.

“Kamo bay buwagan og uyab! Lalim ba?!” tubag ni Mildred.  (Kataposan)