Utility man

Si Angel ang giilang utility man sa baryo Lampi ning dakbayan. Ginganlan siya’g utility man kay abtik nga masugo sa mga silingan bisa’g unsay isugo labay’g basura, hakut og tubig, panglimpiyo sa nataran, pamung-ol og mga kahoy basta dili dautan nga sugo buhaton niya. Di mobungat og suhol. Modawat bisa’g pila. Di moreklamo kon gamyan apan dako og ngisi kon makauyon sa suhol.

Nganlan siya’s mga higala ug kaila nga “Angel” kanang Iningles nga pagkalitok. Puwede sab og Anghel. Higala niya tanang tawo. Wa siya’y libog nga pagkatawo. Mokatawa lang siya’g insultohon o biay-biayon. Di siya makig-away. Kon may moaway niya,mobiya lang siya.

Yano lang iyang panglihoklihok. Duna siya’y biseklita nga iyang sakyan gikan sa iyang barungbarong ngadto sa balay sa mosugo niya. Paborito niyang isul-ob ang iyang tsaliko nga komoplads. Mura sab siya’g barangay tanod tan-awon usahay. Kay white side wall man iyang tupi.

Nag-inusara lang siya sa iyang gipuy-an. Wa’y nasayod kon kinsa iyang mga ginikanan. O diin siya gikan. Nibutho lang siya sa Lampi lima ka tuig na ang nakalabay. Hapit na siya muabot og singkuwenta sa pangidaron. Pero ulitawo lang gihapon. Wa siya’y asawa, kapuyo o uyab. Matawag nga ulitawo siyang guwang. Daghang nitag-an nga bading siya. Pero di makita sa iyang hitsura o linihokan. Wa sab gyu’y nakadungog o nakamatikod nga nitsansing siya’g lalaki.

Usa ka buntag, gipamalihug siyang Jezreel og pamung-ol sa mga kahoy libot sa iyang balay. Tunga sa adlaw una nahuman ni Angel ang pagpamung-ol. Gihatagan siya’g P200 ni Jezreel. Dako kaayo’g ngisi si Angel.

“Kadako ba ini, Sir? Salamat kaayo, ha,” ni Angel. Nitahod siya’g “sir” kay magtutudlo man si Jezreel sa saring publiko sa ilang baryo.

“Aron makapalit ka’g laming sud-an sa imong asawa?” ni Jezreel nga nagpahiyom.

“Kanang asawa? Samok lang na!” ni Angel dayong talikod.

Nakapanglingo si Jezreel nga nisunod og tan-aw ni Angel nga naglakaw. “May tawo gyud diay nga dili bading apan di sab gusto’g babaye,” tuaw niya sa hilom. (Kataposan)