Patik

Unsa may ikapasigarbo nimo anang imong mga patik? ni Romy ngadto’s iyang pag-umangkon nga si Ben. Nagkadungan sila’g pangaon og pamahaw. Nagkaatbang sa lamesa.

Naa magpuyo si Ben sa balay sa iyang Mama Gina, atbang sa ilang Romy. Apan ang inahan ni Ben nga manghod ni Mira, asawa ni Romy, nihangyo nga anha lang pakan-on si Ben sa ila. Nisugot ang magtiayon kay magpadala man si Gina og kuwarta kada-bulan, igo sa konsumo ni Ben.

Domestic helper si Gina sa America, dalaga pa, napaangkan siya. Si Ben ang anak nga wa ilha sa amahan.

Tulo na ang mga tatto ni Ben. Ang una, bulak ug kabakaba sa walang braso. Ikaduha, espada ug timbangan sa tuong braso. Karong bag-o lang, wa pa nialim ang panit ni Ben, agila sa tuong bukton. Napikal si Romy nga nagtan-aw.

“Self-expression lang, tiyo,” ni Ben nga niduko lang og kaon.

“Self-expression? Unsa may ma-express? Nga guwapo ka? Macho? O hambogero?” ni Romy. Nihigop sa tasa sa kape.

Wa na nitingog si Ben. Guwapo gyud hinuon si Ben, mestisohon, husto sa barog.

“Maayo unta nga sa kada-patik nimo,   handumanan ni sa imong achievement. Unang patik pananglitan sa paggradwar nimo’g kurso. Ikaduhang patik, sa pagkasulod nimo’g trabaho. Ikatulong patik, pagkobra nimo sa primerong suweldo.

Kanang mga patika, mas mobilib ko ana. Pero wa ka kahuman og kurso tungod sa bugoy-bugoy sa kabuhong sa kuwartang gikan sa America. Karon, 32 nay imong edad, nagsalig lang gihapon sa inahan. Way nakamaohang trabaho. Way ambisyong makakat-on. Tapulang dako!Mao nay self-expression sa imong mga patik?” ni Romy. Nitindog si Ben. Niurong og kaon. Niinom og tubig. Nigawas.

Ang ikadayeg ra gyud ni Romy sa pag-umangkon, nga bisa’g unsaon og insulto, di gyud motubag. Di sab motukol. Ang binulan nga kuwarta nga diyes mil pesos gikan sa iyang mama, kulang ra’s bisyo. Inom, babaye, barkada. Usahay, shabu. Manghuwam o mangayo pa usahay si  Ben sa mga paryente. Gipul-an na’g tambag si Romy. (Kataposan)