Jezebel

Gula 25

Nagkatinutokay kami si Edward. Unya inanay niyang gipaduol ang iyang ngabil sa akong ngabil.

Dihang nag-akob na ang among mga ngabil, gigakos ko’g hugot ni Edward. Ingon sa nagbugno ang among mga dila sa pinadulot nga hinagkanay. Nabatyagan ko ang kahangol ni Edward nga miukob pag-ayo sa akong ngabil.

Ang kainit sa iyang paghalok nakapakuray sa akong kaugatan.

Paglabay sa pipila ka gutling, gipasandig ko ni Edward sa bungbong sa cottage ug misugod pagkiat ang iyang mga kamot. Nagpanghiram kini sa pribadong mga parte sa akong lawas. Unya gitangtang niya ang akong blouse ug bra.

Serado ang cottage nga nahimutangan namo ni Edward busa wala ko mabalaka nga may laing tawo nga makakita sa among gihimo. Gipasagdan ko si Edward sa iyang gibuhat. Gusto kong lig-onon ang iyang pagsalig nako ug sa akong panumpa nga siya ray lalaki sa akong kinabuhi. Mialalay ko sa iyang gihimo aron dili siya maglisod ug sa ingon, managsama kaming makasinati sa talagsaong kalalim.

Subling gihagkan ni Edward ang akong ngabil. Pagkahuman nabatyagan ko nga ingon sa naghimo’g dalan-dalan ang iyang dila sa akong liog ngadto sa punoan sa akong dalunggan. -- Sumpayan pa